Nongstoiñ, Naitung:
Ki paidbah jong ka thaiñ Ri Mulliang kiba thmu ban leit pyndep ïa ki kam ki jam ha ka shlem treikam jong ka Ri Mulliang C&RD Block ki la shu lut bad sep ei kai ka por wat hadien ba ki la ïai ap baroh shisngi, namar ka jingbym don jong ki nongtrei ha katei ka shlem treikam.
Ïa kane la lap ruh da ka Khasi Students’ Union (KSU) Ri Mulliang Circle ha ka Sngi Palei jong ka taïew hadien ba la pynlong ka jingjurip.
U President ka KSU Ri Mulliang Circle, samla Biangboy Sangriang u la ong, ha kane ka jingjurip, ka seng ka la lap ba u BDO um shym la don bad ki paidbah ba bun ki la ap naduh 9 baje haduh 2 baje noh phai sngi, hynrei ym shym la don nongtrei ha kane ka shlem treikam.
Halor kane ka bynta, ka KSU ka dawa na ka sorkar ba ka dei ban thung ïa u BDO bad ki nongtrei ba pura. Nalor kata, ka dawa ruh ba ka sngi trei kam kan long naduh sngi Nyngkong haduh sngi Thohdieng khnang ba ki paidbah kin ïoh ban pyndep ïa ki kam.
