Nongstoiñ, Naitung 21:
Ki bor distrik ka West Khasi Hills ki la dep ban pynpra 39 tylli ki karkhana thang dewïong be-aiñ kiba don ha ka thaiñ Shallang haduh ka Sngi Thohdieng.
Katkum ka tyllong khubor la ïathuh ba ha ka Sngi Palei, ki bor distrik ka West Khasi Hills ki la ïoh ban pynpra haduh 11 tylli ki karkhana thang dewïong be-aiñ katba ha ka Sngi Thohdieng ki la pynpra hynriew tylli.
Lah ban kdew hangne ba katei ka jingpynpra jong ki bor distrik ïa kitei ki karkhana ka long da kaba shu pynbthei ïa ki atoskhana jong ki karkhana.
Shuh shuh na ka bynta ka bha ka miat bad ka suk ka saiñ jong ki paidbah, la pynjari ïa ka hukum hapoh ka kyndon 144 CrPC kaba la pynmih ha ka 11.07.2023 ban khang ïa ka ïaid ka ïeng jong ki paidbah ne kino kino ki kynhun hapoh 1 km na ka jaka ba don kitei ki karkhana thang dewïong be-aiñ bad la bthah ruh ïa ki paidbah ba kin ïatreilang bad ki bor synshar distrik katba kane ka kam ka dang ïaid.
