Shillong, Naitung 23:
Ka Voice of the People Party ka pynpaw ïa ka jingsngewkhia kaba khraw halor ka jingthmu ban pyntreikam ïa ka National Education Policy (NEP), 2020 ha baroh ki kolej kiba pynïasnoh bad ka North Eastern Hill University (NEHU).
Na ka liang ka seng, ha u kyrwoh ba la phah da u Dr. Kara H. Shen, uba dei u Vice-President ka VPP, ka la ong ba ka kwah ban pan jingpynshai na u Vice-Chancellor bad ki bor ba dei peit ïa kane ka skulbah halor ka jingkynnoh kaba mih na ka Meghalaya College Teachers’ Association (MCTA) bad ka North Eastern Hill University Students’ Union (NEHUSU) ha kaba ïadei bad kane ka jingthmu ban pyntreikam ïa ka NEP 2020.
Kine ki ar tylli ki kynhun ki la pynpaw ba dei tang ka jingleh donbor jong u Vice-Chancellor ka NEHU ban pyntreikam ïa ka NEP khlem da ïoh jingmynjur na ka Academic Council.
“Na ka liang jong ka seng ka dawa ba ki bor ba dei khmih ïa ka NEHU ba lada ki thmu ban pyntreikam ïa ka NEP 2020 ka dei ban long hadien ka jingïatai ïathir bad ka jingïaphylliew jingmut kaba sani bad ki nonghikai, ki bor pynïaid ki jaka pule bad kito kiban shah ktah. Kano kano ka jingpyrshang ban pyntreikam jubor ïa ka NEP 2020 lyngba ki buit bad ki lynti leh jubor dei ban pyrshah tyngeh khlem aili,” la ong u Dr Kara.
Shuh shuh u la ong ba u Vice-Chancellor u dei ban sngewthuh ba wat la u pynïaid ïa ka Central University, u dei ban tip bad sngewthuh ruh ïa ki jingeh bad ki jingduna ba ki kolej ha ka jylla ki ïakynduh.
“U dei ban pynïabiang lang hapdeng ka jingdonkam ka Sorkar Pdeng bad kumjuh ka jinglong jingman ki kolej ha ka jylla. Ngi kwah ruh ban kdew hangne ba ka NEHU kam ju ïarap pisa mynno-mynno ruh ïa ki kolej ba pynïasnoh bad ka na bynta ban kyntiew bad pynbha ïa ki. Namarkata, ka jingkular u Vice Chancellor ban kner ïa ki jingïarap sha ki kolej ba pynïasnoh bad ka na bynta ban pyntreikam ïa ka NEP ka long tang u khiew thylli ba sawa khlem don jingmut,” la ong u Dr. Kara.
Nalorkata, ka VPP ka la ong ba ka kwah ruh ban pynpaw ïa ka jingsngewkhia bad ka jingsngewmong kaba khraw pyrshah ïa ka sorkar MDA, namar kum ban shu pynkynmaw hangne ba dang ha u Nailur 2020, tang hadien ba ka Kynhun Myntri ka Sorkar Pdeng ka la pdiang ban pyntreikam ïa ka NEP 2020, u Myntri Rangbah ka jylla u la pynbna paidbah ba ka jylla Meghalaya kan dei ka jylla kaba nyngkong tam ban pyntreikam ïa kane ka policy.
Ha lyndet kane ka jingpynbna ba khlem pyrkhat da u Myntri Rangbah, na ka liang jong u um shym la leh eiei kum ka jingpynkhreh ban pyntreikam ïa ka NEP 2020 khamtam ha ki jingpule ha ki kyrdan kiba kham hajrong (higher education level), la ong u Dr. Kara.
Ha ka jingshisha, u la ong ba ka long kaba sngewrem ba hadien ba ka NEHU ka la pynbna ba ki jingpdiang ïa ki samla pule ha ki kyrdan undergraduate ha ki kolej ba pynïasnoh bad ka kan long beit lyngba ka eksamin CUET kaba yn pynlong da ka National Testing Agency, na ka liang ka sorkar jylla ka la hap ban khohreh ban kyrpad ïa ka Sorkar Pdeng ban pyllait ïa ka jylla na kane ka hukum ba la pynmih.
Nangta ka VPP ka la ong ba da kiba bun bah ki samla pule ka jylla ki hap ban kun noh tang ha ka jingangnud ban bteng ïa ki jingpule sha ki kyrdan post-graduation namar ym don wat tang ki jaka thoh eksamin ha ka jylla.
“Na ka liang ka seng ngi kwah ban ai jingmut ïa u Myntri Rangbah ka jylla ba un da pyrkhat shuwa ban kren bad haba u kren ruh u dei ban kren kham duna da ka ktien hynrei ai ba ka kam kan sawa jam,” la ong u Dr. Kara.
Shuh shuh ka VPP ka la ong ba u Myntri ka tnat pule puthi ka jylla u Rakkam A. Sangma ha ka 1 tarik Jylliew, 2023 u la pynpaw sha ki lad pathai khubor ba ka jylla Meghalaya kam pat long kaba la khreh ban pyntreikam ïa ka NEP 2020 ha ki kolej na bynta ka snem pule (academic session) 2023-24.
“Hynrei kiei ki daw kiba pynlong ïa ka jylla kan long kaba la khreh kynsan kynsan tang hapoh ar bnai ban pyntreikam ïa ka NEP 2020 hadien ka jingkren u Myntri ka tnat pule puthi sha ki lad pathai khubor?” la ong u Dr. Kara.
“Kiei ki sienjam kiba ka sorkar jylla ka la shim ha kine ki shibnai shiteng ban pynlong ïa ki kolej ha ka jylla ban pyntreikam ïa kane ka policy? Hato u Myntri ka tnat Pule Puthi ka sorkar jylla u tlot haduh katta katta kaba pynlong ïa u Vice Chancellor ka NEHU ban pynbor ïa u ban bret sha kyndong ïa ki jinglap jong u ïa ka jinglong ki jaka pule ha ka jylla? Hato ka sorkar jylla ka tieng eh thot-thot ban pynsngewsih ïa u Vice Chancellor ka NEHU bad ruh ïa ki Myntri ha New Delhi?”
“Kiei ki sienjam kiba ka sorkar jylla ka shim na bynta ban teh lakam ïa ka jingrem dor ka pule puthi ha ka jylla lada pyntreikam ïa ka NEP? Hato ka sorkar jylla ka sngewthuh ba lada pyntreikam ïa ka NEP kiba bun ki samla kin ym ïoh lad shuh ban bteng ïa ka jingpule jong ki namar kumba long mynta ngi dei ka jylla ba wan ba-ar ha ka jingduk ha ka ri?”
Nalorkata, u Dr Kara u la ong ba ka jingsngap man-man ka sorkar jylla ïa ka rai ba la shim da u Vice-Chancellor marwei ka pynlong ïa baroh ban sah ka umdum.
“Kaei ka daw kaba ka sorkar jylla ka sngap beit man-man khlem nud saham pyrshah ïa ka jingbthah ki bor ka NEHU? Ki nongshong shnong ka jylla ki donkam kyrkieh ba u Myntri Rangbah ka jylla bad ruh u Myntri ka tnat pule puthi kin ai jingshai halor kine ki jingkylli. Kumba long mynta lei i kumba u Myntri ka tnat pule puthi um tip kumno ban pyntyllun ïa kane ka tnat,” la ong ka VPP.
Shuh shuh u Dr Kara u la ong ba u Myntri Rangbah u dei ban pyrkhat sani ïa kane bad ban bujli noh ruh da kiwei ki Myntri kiba don ka bor bad ka jinglah ban pynïaid ïa kane ka tnat.
“Ka lawei ki khun ki kti bad ki hep barit ym lah ban aiti ban pynïaid ha kito kiba ym don ka jinglah ban synshar bad pynïaid bha kumba dawa ka kam ba la bynshet ha ki,” la bynrap ka VPP.
