Tura, Naitung 23:
U MDC ka BJP na Tura, u Bernard N Marak u la ong ba u Myntri Rangbah u Conrad K Sangma u dei ban pynbna ïa ka Tura kum ka nongbah por tlang ha ka jingïakynduh bad ki kynhun kiba la mih shakhmat ban buh ïa ka jingdawa.
U la ong ba kane ka jingpynbna kan long ruh kum ka jingsiew kylliang ïa ki paidbah ka Rilum Garo kiba la pynjop bun ngut ki MLA khamtam ka Tura kaba la pynjop ïa u Myntri Rangbah.
U Bernard u la ong ba ki paidbah ki la kyrshan namar u dei u Myntri Rangbah uba dei u Garo bad ba u mihkhmat ïa ka NPP kaba dei ka seng Garo.
“Ïa ka NPP la thaw ban ïeng kum ka seng na Garo bad ban trei na ka bynta ka bha ka miat ki paid Garo. Ka la dei ka por ban pynshisha ba ka nongrim ka NPP ka ïeng na ka bynta ki Garo. Ki paidbah ka Rilum Garo ki la ju kyrshan ïa u P.A. Sangma uba ju ñiew ïa ki Garo kum ki khun lajong,” la ong u Bernard.
Namarkata, u la ong ba ka jingdawa ban ithuh ïa ka Tura kum ka nongbah por tlang dei ban pdiang da kaba buh jingmut ruh ba ki Garo ki la pynkupbor ïa ka ïing ka sem jong u bad ïa ka NPP.
U Bernard u la pynkynmaw ruh ïa u Myntri Rangbah ba u dei ban pynurlong ïa ka jingkular ban pynïoh 5 lak ki kam na ka bynta ki samla ka Jylla kaba u la kular ha ka por ba ïalap ilekshon.
U la ong ba ka rai u Myntri Rangbah ban ïakynduh ïa kiba ïakhih da kaba shong shah thngan ka long kaba bha wat lada ka slem, ban ïa kaba ym ïakynduh (better late than never).
U la ai khublei ïa u Myntri Rangbah uba la kloi ban ïakynduh ïa kiba ïakhih hadien 13 sngi, hynrei u la ong ba ka rai ban ïakynduh ha Tura Circuit House ym ha ka jaka ïakhih kam long satia kaba dei namarba kiba ïakhih ki la ïai ap bad shong la 13 sngi bad u Myntri Rangbah u dei ban burom ïa ki namarba u la ai jubab hadien artaïew tam.
Shuh shuh une u MDC ka BJP u la kynnoh ba ka NPP ka ñiew ïa ka BJP kum ka seng liang pyrshah ha Rilum Garo bad ym don satia kata ka jingsynrop hapdeng kine ar tylli ki seng.
