Shillong, Naitung 23:
U paidbah ba bun balang na ki jaidbynriew bapher-bapher u la ïalum lang ha ka Sngi U Blei ha Don Bosco Square, Laitumkhrah ban pynrem ïa ka jingïakynad jaidbynriew ha Manipur kaba la neh mynta la jan lai bnai khamtam haba ïadei bad ka jingthombor ïa ki kynthei ha katei ka Jylla.
Katei ka jingïalang ba la tip kum ka ‘Peace With Justice for Manipur Now!’ ba la khot da ka Manipur Support Group (MSG) ka dawa ruh ba ka jingïakynad ha katei ka Jylla ka dei ban sangeh noh shi syndon khnang ba ka suk ka saiñ ka lah ban wanphai biang sa shisien.
Nalor ki jingthoh pynrem ha ki ‘Placard’, kawei na ki sur jingdawa kaba la sawa jam ha kane ka sngi ka long, “Kaei kaba ngi kwah…Jingsuk. Lano ngi kwah ïa ka…Mynta!!!”
Ha kajuh ka por, la ïohsngew ruh ïa ki sur jingpynrem kiba la pyrta pyrshah ïa ka Sorkar Manipur hapoh ka jingïalam u N. Biren Singh namar ka jinglong-jingman hapoh ka Jylla bad kiwei-kiwei.
Ki nongwan ïashim bynta ha kane ka sngi ki la rwai ruh ïa ki jingrwai ba paw kum ka, “Make me a Channel of your Peace” bad “We shall Overcome”.
Ka nongtrei mon sngewbha, Kong Angela Rangad kaba la ai jingkren ha kane ka sngi ka la ong ba dei ban kyntait shi syndon ïa ka politik jong ka jingïaphiah.
Haba pynrem ïa ka jingthombor pyrshah ki kynthei, ka Kong Rangad ka la ong, “Ki kynthei kim kwah shah pyndonkam hangno-hangno kiba kwah ban pynsaphriang ïa ka jingisih,” watla ka la ong ba ïa ka jingisih lah ban tyllep da ka jingieid.
Ka la kynnoh ruh ba dei ka Sorkar Pdeng kaba la shah ïa kine kiei-kiei baroh ban jia hapoh ka thaiñ bad kumta dei ma ka, ka ban hap jubab sha ki lanot.
Sa uwei u nongtrei mon sngewbha, Bah Kyrsoibor Pyrtuh u la kyrpad ïa ki Dorbar Shnong bad ki bor Sorkar ban pynsuk ïa ka leit ka wan jong ki poiwir na Manipur.
Katkum ka jingsngewthuh jong u, kito kiba la wan phet na Manipur ki ïakynduh jingeh ha Shillong.
U la ong ruh ba ki bor pynïaid shnong lem bad ki nongshong shnong ki dei ban ïarap ïa kiba wan na Manipur ha ka ban tei biang ïa ki jingim jong ki lyngba ka jingkyrshan.
Na ka liang u Caldwell Manners uba la ïashim bynta lang ha ka jingïalang u la ong ba ka jingthmu ka long ban pyni ïa ka jingïalong tylli bad ki nongshong shnong lem bad ki lanot ka Manipur.
“Ngi wan hangne ban kyrpad na bynta ka suk ka saiñ, ban wanrah biang ïa ka jingïadei bad ban pynkut noh ïa ka jingïakynad baroh,” la ong u Manners haba kren sha ki lad pathai khubor.
U la ong ruh ba kiei-kiei baroh kiba la jia ka dei namar ka jingbym larkam jong ka Jylla (Manipur) ban tehlakam ïa ka jingïakynad.
Katkum ka jingsngew jong u, ka Jylla ka don ïa ka bor ban pynkut ïa ka jingïakynad hynrei kam don mon ban leh ïa kane.
Shuh shuh u la kyrpad ïa ki bor pynïaid shnong ha Shillong ban shah ïa kito kiba wan na Manipur ba kin sah shi por ha ka nongbah.
U la pynpaw ruh ka jingsngewkhia ba ki khynnah pule kiba la phet na katei ka Jylla ki lah ban duh noh shi snem ka jingpule jong ki bad kyrpad ïa ki skul ha Shillong ba pdiang ïa ki lada long kaba lah.
Ha kane ka sngi, ki paidbah ki la ïashim bynta ruh ha ka ban thang ïa ki mombati.
