Tura, Naitung 23:
Hashuwa jong ka jingïakynduh bad u Myntri Rangbah ka Jylla, u Conrad K. Sangma ha ka Lah Sngi U Blei, ka ACHIK ha ka Sngi U Blei ka la ong ba ka jingïakynduh ka dei ban long ha Mini Secretariat bad ym ha Tura Circuit House naba ka long ka jaka kaba biang na bynta ki jingïakren, ka jingkhuid jingsuba bad ka jingïadon bynta lang jong ki nongshong shnong haba ïadei bad ka jingshim rai.
Ha ka shithi ba la phah sha u Myntri Rangbah ka Jylla, ka ACHIK ka la ban jur halor ka jingdonkam ban don ïa ki jingïakren kiba tei ha ka jaka ka ban pynsuk ïa baroh.
Ha kajuh ka por, ki la ong ba ka Mini-Secretariat, kum ka shlem treikam Sorkar kaba don hapdeng ka sor, ka long ka jaka kaba biang eh na bynta ki jingïakren.
U Laben Ch Marak, ophisar MCS barim, bad nongaiktien ka ACHIK, u la ong, “Ngi ngeit ba ki rai haba ïadei bad ka ‘Winter Capital’ bad ka ‘Backlog Policy’ dei ban shim ha ryngkat ka jingïadon bynta lang jong ki paidbah kiba don jingïadei bad kine ki mat treikam. Kane ka dei ka jingdawa ba shong nongrim jong ngi ban pynurlong ïa ka jingïateh jong ki nongïalam ba pynïoh Jylla. Ngi la shah thngan la 13 sngi bad ngin bteng katba ngim pat ïoh pdiang ïa ka khubor kaba bha. Dei ma ngi ki ban ïakren bad u Myntri Rangbah bad ym kiwei pat ki nongmihkhmat ki bym don bynta eiei bad kane ka jingïakhih shah thngan. Ka Mini-Secretariat ka long ka jaka kaba biang na bynta jong ngi ban pynpaw ïa ki jingsngew bad jingai jingmut jong ngi.”
“Naba u Myntri Rangbah u la pdiang ïa ka jingkyrpad ka ACHIK, ki nongshong shnong ki kyrmen ba ka Sorkar kan jubab na bynta ka jingmanbha bad buh hakhmat ïa ka jingïakren kaba tei ha Mini-Secretariat. Kane ka sienjam kan long ka dak jong ka jingshimkhia ki bor ba dei khmih na bynta ka bha ka miat jong ki paidbah bad ka jingpynneh pynsah ïa ka lariti jong ka thaiñ,” la ong u President, u Thomas M. Marak.
