Shillong, Naitung:
Ka tnat jngohkai jong ka sorkar jylla ha ryngkat bad ka Meghalayan Age Limited ka la pynlong ïa ka Ateliers Meghalaya Awards 2023 ha kaba ki nongshna kiba pynwandur ïa ki jingshna bapher bapher kiba la shna da ki kti kaba la pynlong ha Courtyard by Marriott Shillong.
Haba ai jingkren kum u kongsan ha katei ka sngi, u Myntri Rangbah ka jylla, Conrad K Sangma u la ai khublei kyrpang ïa baroh ki nong ïohpdiang ïa katei ka khusnam ha katei ka sngi kiba la trei shitom ha ka kam ka jong ki bad kiba la pynneh pynsah ïa ki kolshor, ki deiti bad pynim ïa ka kyrteng.
U la ïathuh ba ha ka por ba la sdang ïa katei ka prokram ha u snem 2021, ka tnad ka la jied kumba 23 ngut ki nongshna jingshna bad ki la ai ïa ka mang tyngka kaba T. 5 lak sha kitei ki 23 ngut. Hadien ka jingwan jong ka kynhun kaba ar, ka tnad ka la ai kham duna ïa ka mang tyngka namar ba la ki la bun ki nongshna jingshna.
“Katba ngi dang ïatrei ban kyntiew bad pyntikna ba ki nongshna jingshna ki ïoh ïa ka jingkyrshan bad ngi la lah ban leh kham bha ban pynneh ïa ka riti ka dustur, ka kolshor bad ïa ki rukom long jong ki ban pynim bad ban leh kham kham bha hynrei ha kajuh ka por ban thaw ïa ka lad kamai kajih na kaei kaba la don lypa”, la ong u Myntri Rangbah.
Shuh shuh u Myntri Rangbah u la ong ba da kaba lah ban pynïadei ïa ki nongshna jingshna, ka tnad kam jngoh kai pyrthei bad ki nongseng kam lajong kan long kawei na ki lad ki rynsan ka ban plie bad ki jingïoh jingmyntoi ha ka jingmih jingïoh bad ha ka lad kamai kajih.
Ha kaba ïadei bad ka jingpaw jong ka jylla Meghalaya ha ka kyrdan ba ar kum ka jylla kaba duk tam ha ka thup jong ka Niti Aayog, u Myntri Rangbah u la ong ba katei ka jingpoi jong ka jylla ha ka kyrdan ba ar ka dei kaba shisha, hynrei kitei ki dei ki jingthew bad ki jingpeit bniah kiba naduh u snem 2018-2019, hynrei ka kaiphod ka dang shu mih mynta ïa kiei ki jingjia bad ki jinglong ha u snem 2018-2019.
“Lada ngi khmih lynti ba tang ha ka shisnem ngin lah ban pynkylla ïa kiei kiei, kam dei kaba suk bad kaei kaba ngi ïohi mynta ha ka kaiphod jong ka Niti Aayog ka dei kaba la kren bad pynmih ïa ki kaiphod jong u snem 2018-2019 ym ki jingkheiñ jong u snem 2020, 2021, 2022”, la ong u Myntri Rangbah.
U Myntri Rangbah u la ong ba kaei kaba la jia ha 4-5 snem ki la don shibun tylli ki jingkylla ha baroh ki liang jong ka roi ka par bad ka jingmih jingïoh.
“Ngi khlem pynkylla ïa kiei kiei, hynrei ngi la shu leh kham pher bad kata ka dei kawei na ki nuksa kumno ba ngin leh kham bha shuh shuh bad ngim donkam ban pyrshang ban bud tynneng ïa kiwei ki jylla lane ïa kiwei ki ri hynrei ngi la don lypa ïa ka jingshai hapoh jong ngi bad kaei kaba ngi donkam ka long ba ngin pyntikna ba ngin tyngshaiñ bad ban ailad ban pynpaw ïa kata shabar bad ban ai mynsiem ïa ki briew jong ngi”, la ong u Myntri Rangbah.
Na ka liang u Myntri ka tnat jngoh kai pyrthei ka sorkar jylla, u Bah Paul Lyngdoh u la ong ba da kane ka sap shna jingshna kaba ngi don, yn nym don kano kano ka ban khang lynti ba ngin ïoh kheit ïa u soh ka jingjop.
“Ngi don hangne ban pynpaw ïa la jingkmen ka jong ngi na ka bynta kine ki samla seng kam lajong kiba la sei madan bad pyninam ïa kine ki jingshna jong ki”, la ong u Bah Paul.
