Jowai, Naitung 23:
Da ka jingthmu ban wanrah biang ïa ka jingsngew shngaiñ ha ki nongshong shnong ka shnong Khanduli kumjuh ka jingïatylli hapdeng ki nongshong shnong jong ki shnong khappud bad ki shnong kiba dang don ha ka jingïakajia pud bad ka Assam, ka seng kaba dang thymmai, ka Namdong Block & Laskeiñ Block Border Area Peace Committee (NBLBBAPC) ka la pynlong ïa ka jingïalang paidbah kaba nyngkong hadien ba la dep seng ïa ka ha ka 20 tarik u Jymmang mynta u snem.
Ïa kane ka jingïalang paidbah la pynlong ha madan Phutbol ka shnong Khanduli kaba hap hapoh ka Namdong Block ha ka Sngi Saitjaiñ ha kaba ki nongshong shnong jong ka shnong Khanduli, Moojem, Moolber bad ki marjan-marpa ki la wan shim bynta ha katei ka jingïalang paidbah.
Katba ka jingïalang paidbah ka dang ïaid, la ïoh khubor ba ki khynnah sharai masi ki shah beh ha ki Karbi. Ki nongshong shnong ki kynnoh ba kane ka jingleh jong ki Karbi ka long ban pynthut ïa ka jingïalang paidbah.
Ha kane ka jingïalang la ïoh ka jingkren jingpynshai na ki ’riew rangbah kiba kynthup ïa u nongsaid aiñ ba rangbah ka Jylla, u Bah Erwin K. Sutnga uba long ruh u Chairman ka Joint Action Committee Border of Meghalaya (JACBoM), u Syiem barim ka Hima Mylliem, u Pa’iem Laborious Manik Syiem, u Bah W. Passah, nonghikai barim ka St. Edmund’s College, Shillong, u MDC ka Khanduli, u Bah Dawan Lyngdoh, u Chairman ka HBDRF, u Bah Chandame Sungoh nalor ki Waheh Shnong ka thaiñ Block-1 bad kiwei-kiwei.
U Bah Erwin K. Sutnga ha ka jingkren u la ïathuh ba Supreme Court ha ka 18 tarik mynta u bnai ka la buh por hadien ka 20 tarik u bnai Nailar ban shong bishar halor ka mukotduma jong ki halor ka jingïakajia khappud bad ka jylla Assam.
U la ong ba ki la dep sei lut ïa ki kot ki sla kiba kynthup ïa ka ‘Map’ kaba naduh u snem 1896 bad ïa ki ‘Notification’ 1957-58 kiba ïadei bad ki jaka ïakajia bad ka Assam.
U Bah Erwin u la byrngem ba lada don ka jingbakla ha ka jingpynbeit pud kin pan na ka ‘Supreme Court’ ban don da ka ‘Monitoring Committee’ namar ïa ki jaka ba hap hapoh ka ‘Sixth Schedule’, ka Sorkar kam don hok ban pynphai ne ai sha ka Assam.
Shuh shuh u la byrngem ba lada don ka jingleh bor nangne shakhmat pyrshah ïa ki Khasi Pnar kin ujor sha ka ‘Supreme Court’ bad pan ïa ka jingïada na ka.
U la bynñiaw ba ha ka jingpynbeit pud kaba nyngkong, ka Meghalaya ka la duh noh kumba 14 hajar haduh 16 hajar ‘square kilometre’ ki jaka.
U Bah Erwin u la ong ba kane ka Sorkar ka ju kam ba dei tang ma ka, kaba lah ban pynbeit ïa u pud u sam, hynrei ki Sorkar kiba mynshwa ruh ki la pyrshang ban pynbeit ïa u pud u sam hynrei hadien ba ki sngew ba ka eh ki la ieh noh hynrei ha kane ka Sorkar kaba mynta pat nalor ba kam tip bad shemphang eiei ha kaba ïadei bad u pud u sam, ka la ktah ïa kane ka kam bad duh bun ki jaka.
U Syiem barim ka Hima Mylliem u Pa’iem Laborious Manik Syiem ha ka jingkren u la pynkynmaw ba la pdiang ïa ka Jylla khlem pud khlem sam bad ka jingpyntreikam da ka North Eastern Reorganization Act, 1971.
U la batai ba kata ka North Eastern Reorganization Act, ka ong ban pynbeit pynbiang ïa ki pud ki sam kiba dei hapoh North East kynthup ka Nagaland, Mizoram, Meghalaya bad Arunachal Pradesh.
U Pa’iem u la ong kam dei shuh ka kam ban dang shu ïa khot ban pynkhih hynrei shi jam shakhmat u mawjam la kam bad kaba nyngkong ka Khanduli bad ki 36 shnong kin ïeng kawei ka jingmut jingpyrkhat ban dawa ïa la ka hok bad haba ki ar CM ki wan ha kano-kano ka por ki paidbah kin mih ryntih.
Ha kaba ïadei bad ka thaiñ Block-1 u la ong ba khlem artatien lada ki kot ki sla baroh kiba ki don kin lah ban pynmih da ki ‘Original’ bad ka Block-1 kan wanphai sha Meghalaya.
