Shillong, Naitung 23:
Kawei ka kaiphod na ka International Institute for Population Sciences (IIPS) ba la pynmih dang shen kaba la ai kyrteng “Polygyny in India: Levels and Differentials”, ka la lap ba ka East Jaiñtia Hills ka dei ka distrik ha ka Ri India baroh kawei kaba ka jingdon ki shynrang kiba bun kurim ka long kaba shyrkhei tam eh, katba saw tylli kiwei pat ki distrik ha Ri-Lum Khasi Jaiñtia ki don lang ha ka thup jong ki 40 tylli ki distrik kiba wan hakhmat ka jingdon ki shynrang kiba bun kurim lane ka ‘Polygyny’.
Ïa katei ka kaiphod jong ka IIPS la thoh da ki lai ngut ki nongwad bniah kiba la pule ïa ki jingshem na ka National Family Health Survey (NFHS). Ki nongwad bniah ki la pyndonkam da ki jingkheiñ jingdiah na ka NFHS 2005-06, 2015-16 bad 2019-21.
Na kitei ki lai tylli ki bynta jong ka NFHS, la ïoh jingtip katno ka jingjur jong kata ka jingdon ki shynrang kiba bun kurim. Ki kynthei/longkmie kiba la ai jubab ha ka sorjamin jong ka NFHS ki la hap ban jubab ïa kane ka jingkylli: “Nalor jong phi, u kurim jong phi u dang don sa kiwei pat ki kurim?” Ki kynthei/longkmie kiba la ai jubab ki dei kito kiba hapdeng 15 bad 49 snem ka rta.
Na ki jingkheiñ jingdiah, la shem ba ka jingdon ki shynrang kiba bun kurim ka la hiar na ka 1.9% sha 1.4% hapdeng ki snem 2005-06 haduh 2019-21. Ha u snem 2005-06, ka Arunachal Pradesh (6.9%) bad Sikkim (5.6%) ki wan hakhmat ha ka jingdon ki shynrang kiba bun kurim.
Hynrei, ha u snem 2019-2021, la shem ba dei ka Meghalaya (6.1%) bad Mizoram (4.1%) kiba wan hakhmat eh ha ka jingdon ki shynrang kiba bun kurim.
Lait noh ki khyndai tylli ki jylla, kata, ka Chandigarh, Delhi, Punjab, Rajasthan, Jharkhand, Meghalaya, Tripura, Maharashtra, bad Puducherry, ka jingdon ki shynrang ba bun kurim ka la hiar hajan baroh kiwei pat ki jylla hapdeng 2015-16 bad 2019-21.
Nalorkata, ki distrik kiba bun tam eh ki shynrang ba bun kurim ki don ha ka jylla Meghalaya, Arunachal Pradesh bad Odisha.
Kaba wan hakhmat duh napdeng ki distrik ka dei ka East Jaiñtia Hills (20%), Kra Daadi (16.4%), West Jaiñtia Hills (14.5%), bad West Khasi Hills (10.9%). La shem ruh ba ha South West Khasi Hills ka long 6.4%, ha Ri-Bhoi ka long 6.2% bad ha East Khasi Hills ka long 5.8%.
Ha ka kaiphod, la kdew ba kiba bun ki kynthei kiba ngat ha ki shynrang kiba bun kurim ki dei kito ki baduk, bym biang ka jingnang jingstad, kiba sah ha nongkyndong bad kiba la kham rangbah ha ka rta. Ka la kdew ruh ba hap ban kynmaw ba ka jingdon jong ki shynrang kiba bun kurim ha India ka long kaba duna bad ka la sdang ban jah suki-pa-suki.
