Jowai, Naitung 23:
“Ki Khynriam ki ju ong ba ki Pnar ne ki nong Jaiñtia ki dei kiba riewspah ba ki don ïa u dewïong hynrei nga la lap dalade ïa kiba duk ha Jaiñtia Hills, bad ki kham duk ban ïa ki Khynriam.”
Ïa kane la ong da u President ka Voice of the People Party (VPP), u Bah Ardent Miller Basaïawmoit, ha ka jingïalang paidbah kaba long ha Khliehriat West ha ka Sngi Saitjaiñ.
U Bah Ardent u la ong ba kiba bun ki ñiew ba ki nongshong shnong ha Rilum Jaiñtia ki dei kiba riewspah, hynrei ki jaka kiba u la wan, u la lap ba, ki nongshong shnong kiba duk ha Jaiñtia Hills ki dang duk bun shah ban ïa kiwei ki jaka.
Nalorkata u la ong ba ym dei tang ba ki duk hynrei ki sahdien ruh ha ka bor pyrkhat bad ha ka liang ka roi ka par kaba la isangsot.
U la ong ban law ïa kane ka jingshah teh shah khum, ka jingshah ban beiñ naduh ka kamai kajih, ka jingbym don ki jaka sumar kiba biang, ki jaka pule kiba biang ka dei beit satang lyngba ka synshar khadar bad ka jingstad ban jied ïa ki nongmihkhmat.
Ha kaba ïadei bad ka kam saiñ hima sima ha Rilum Jaiñtia, u la ong ba ka ‘politik’ ha Jaiñtia Hills ka ïapher na kiwei ki jaka.
“Ka politik ha Jaiñtia Hills ka dei beit ka politik jong ka bor pisa, ka byrngem briew bad ka politik leh jubor,” la ong u nongïalam rangbah ka VPP.
Shuh shuh u la ong, kane ka rukom long jong ka saiñ pyrthei na kane ka thaiñ ka sdang ban pur wat sha kiwei kiwei ki bynta jong jylla bad kaba kum kane ka politik ka la wan hapoh ka konstitwensi kaba ma u, u ïakhun. Hynrei u la pynpaw ka jingsngewtynnad ba ki paidbah ka konstitwensi jong u lyngba ka Voice of the People Party ki la ïeng pyrshah ban pynrem ïa kaba kum kata ka politik.
Hadien ka jingïalang paidbah, ka VPP ka la pynrung dkhot thymmai na ka bynta ka Sutnga Saipung bad ka Khliehriat Constituency.
Kiba ïadonlang ha kane ka jingïalang ki long u Dr Ricky AJ Syngkon, General Secretary ka VPP uba dei ruh u kyrtong MP Lok Sabha, ki dkhot ka VPP na East Jaiñtia Hills u Bah Damewanhi Rymbai, General Secretary VPP, Khliehriat Circle u Bah N Dkhar bad ïa ka jingïalang la pynïaid da u Organising Secretary, u Bah Shining Siangshai.
