Shillong, Naitung:
U Myntri Rangbah ka Jylla, Conrad K. Sangma u la pyllait ïa ka ‘Poster’ jong ka phlim u Dominic Sangma kaba la ai kyrteng ‘Rapture’ ha shlem treikam jong u ha ka Sngi Thohdieng. Dang shen, kane ka phlim ka la shah jied ban mihkhmat sha ka ‘Locarno Film Festival’, Switzerland ka ban long naduh ka 2 tarik haduh ka 12 tarik u Nailar mynta u snem. “U Dominic u long uwei napdeng ki direktor uba la paw bha bad ka phlim jong u ka la shah jied na bynta kawei ka tamasa phlim ha Switzerland bad ngi kyrmen ba un jop ha ka thup kyrdan jong u,” la ong u Sangma haba kren sha ki lad pathai khubor.
Haba ïathuh ba u Dominic u la wan ha shlem treikam jong u ban sam ïa katei ka khubor kumjuh ban kyrpad pyllait ïa ka ‘Poster’ jong ka phlim, u Myntri Rangbah u la pynpaw ka jingkyrmen kaba bha na bynta utei u nongshna phlim ka Jylla bad kular ruh ban ai ka jingkyrshan la ka long ha kano-kano ka liang. U la ong ruh ba u Dominic u long ka jingai mynsiem na bynta kiwei pat ki nongshna phlim ka Jylla ba lada ma u (Dominic) u lah ban poi sha katei ka rynsan kaba heh jong ka pyrthei lyngba ka jingtrei shitom bad jingminot, u Sangma u kyrmen skhem ba kiwei ruh ki lah ban leh kumjuh. “Nga kyrpad ïa kiwei ki nongshna phlim ban bud ïa ki dienjat jong u Dominic,” u la ong.
Na ka liang u Sangma u la pynsngew ba ka Sorkar ka dang ïaid shakhmat ha ka ban wanrah ïa ka mat treikam ban jingkyrshan pisa ïa ki nongshna phlim ka Jylla khnang ba ki lah ban pynmih ïa ki phlim jong ki.
“Ngi dang ïaid shakhmat ban pynïeng ruh ïa ki ‘Cinema Hall’ ha man la ki distrik. Ngi khmih lynti ban pyndep ïa kane hapoh kaba kut jong ka samoi treikam. Ngi sngew ba kane kan ïarap shi kat dei ïa ki nongshna phlim ka Jylla,” u la ong. Shuh shuh u Myntri Rangbah u la bynrap ba ka Sorkar kan pyrshang ban bteng biang ha ka ban pynlong ïa ki tamasa phlim khnang ba ki ‘riew don sap ha ka laiñ shna phlim ki lah ban tip kham bniah halor ka rukom shna phlim.
“Ngi sngew ba ka karkhana pynmih phlim ka don shibun kiei-kiei hynrei ngim pat lah ban pyndonkam bha ïa ka,” u la ong.
