Shillong, Naitung 23:
Ka dor jong ka bai kali lada shong da ka ar shaka ka dei T.10 shi kilometre, bad lada shong tam sa shi kilometre, hap siew tam sa T.5 kaba mut ba lada shong 2 kilometre, ka dor ka long T.15.
Ka Kynhun Myntri ka la dep mynjur ïa ki ar shaka kiba ju kamai khlem siew khajna sha ka Sorkar ba kin kamai da kaba siew ïa ka bai laisen bad bai permit sha ka Sorkar. Kine ki ar shaka kin ngat ha ka kyndon aiñ kaba tip kum ka Meghalaya Taxi Aggregator Operation Rules, 2020.
Na ka bynta kawei ka ar shaka, u nongñiah un hap ban siew kum ka bai laisen kaba long T.700 shisnem, katba ka bai permit ka long T.200 shisnem lada ki kamai tang ha ki jaka kiba la batai lypa kum ha nongbah ne district, hynrei lada kamai ha baroh kawei ka Jylla, ka bai laisen ka long T.1300 bad ka bai permit ka long T.200.
Ka dor kaba dei ban oh lada shong da kine ki ar shaka ka long T.10 man ka 1 km. Yn kheiñ tam sa T.5 man lada shong tam ïa ka shi kilometre, bad lada kiba shong da ka ar shaka ki phah ap ïa u nongñiah, ka bai phah ap ka long T.4 tyngka man ka 5 minit.
Kine ki ar shaka kiba kamai ki dei ban don GPS, hap ban pynrung kyrteng bad ka tnat Transport, ban dei ban pyni kyrteng jong ki nongñiah na ka bynta ka jingshngaiñ ki nongshong ar shaka.
Kine ki ar shaka kiba kamai kum ki taksi, kin hap pynkylla ruh ïa ka rong number plate kumba long ki kali kamai.
Kumba ka long mynta, ki ar shaka ki dei kiba dang kamai be-aiñ khlem pat pynrung kyrteng bad ka tnat Transport jong ka Sorkar Jylla. Ka jingdon kine ki ar shaka kiba kamai khlem kot khlem sla, ka ktah bad nang pynhiar ruh ïa ka jingkamai ki taksi kiba ju kamai da kaba siew khajna sha ka Sorkar.
Mynshwa ki don ki Rapido kiba la pynrung kyrteng bad ka kompani kaba pynïaid ïa kane ka rukom kamai.
