Shillong, Naitung 23:
Ka jingbun ki kali ha nongbah Shillong ka la dei hok ïa ki surok ban khapngiah bad ha kine ki khyndiat sngi ka jingbun ki ar shaka ka la long shaba palat.
Katkum ka jinglum jingtip na ka tnat Transport, la ïoh jingkheiñ ba tang ki ar shaka kiba dei ki ML05, kiba kynthup ïa ki Bike, Scooter bad Scooty ki don haduh 72,309 tylli kiba la pynrung kyrteng ha shlem treikam u District Transport Officer ka East Khasi Hills district Shillong.
Kane ka jingkheiñ halor ka jingdon ki ar shaka bad ki saw shaka kiba dei ki ML05 ka dei kaba la buh jingthoh naduh ka 1 tarik Naitung, 1973 haduh ka 21 tarik Naitung 2023.
La ong ba na kine ki 72,309 tylli ki ar shaka, 13,591 tylli ki dei kiba la kut ka ‘fitness’ kiba khlem leh thymmai shuh, bad 1,548 tylli pat ki dei ki bym da kham ïaid shuh ha surok.
Haba phai sha ki saw shaka kiba dei ki ML05, ki don haduh 87,718 tylli. Na kine, 20,274 tylli ki dei kiba la kut ka ‘fitness’ jong ka kali, katba 8,704 tylli ki dei ki bym da kham ïaid shuh ha surok.
Lada kheiñlang ïa ki kali ar shaka bad ki saw shaka baroh ki long 1,60,027 tylli tang kiba dei ki ML05.
Ka jingdon kine ki kali tang kiba dei ki ML05 ka pyni shai ba ka Shillong ka la khapngiah shaba palat namar ka dei ka nongbah kaba ki kali na kylleng ki district ka jylla kynthup na Assam bad kiwei ki Jylla ki wan ïaid lyngba.
Lada kheiñ sa ki trok bad kiwei kiwei ki kali heh kiba ïaid lyngba ki surok ka nongbah Shillong, ka jingdon ki kali ka la bun shaba palat, bad nang pynjur ïa ka dheng kali.
