Shillong, Naitung 23:
Ka Synjuk ki Nongsynshar Shnong ka Bri u Hynñiewtrep (SNSBH) ka la kyrpad ïa u Myntri Rangbahduh ka ri, u Narendra Modi ban pyntreikam ïa ka President’s Rule ha Manipur khnang ban wanrah biang ïa ka suk ka saiñ ha katei ka Jylla.
“Ka SNSBH ka pynpaw ka jingsngewsih halor ka jinglong-jingman ha Manipur bad ngi pyrshah jur ïa ki kam thombor ïa ki kynthei ’riewlum kumba la saphriang ha ki rynsan lad pathai bad kumba la paw ha ki lad pathai khubor,” la ong General Secretary ka SNSBH, Bah R.L. Blah ha ka dorkhas ba la phah sha u Myntri Rangbahduh ka ri, u Narendra Modi.
Haba kdew ba ka jingïakynad ha Manipur ka jia ha ka samoi treikam jong u Modi kum u Myntri Rangbahduh ka ri, ka Synjuk ka la ong ba u Modi u la pyni ïa ka jinglah jong u ha kiba bun ki bynta bad kine baroh ki la pynlong ïa ka Synjuk ban ngeit ba ka jingjia ha Manipur kan sa jai-jai tang lada u Myntri Rangbahduh u don ka mon.
“Phi tip bha shaphang ka jinglong kyrpang jong ngi kum ki ’riewlum Hynñiewtrep (Khasi-Jaiñtia) bad ka jingïakynad ha Manipur kaba la wanrah jingjulor shi kat dei ïa ki jaidbynriew ’riewlum ka la wanrah ruh ka jingtieng bad jingbym shaniah ha ka jingmut jingpyrkhat jong ngi. Ngi kum ki ’riewlum, ngi sngewsih kthang ban ïohi ba ki hynmen ki para jong ngi ki mad ïa ki jingshah thombor bapher-bapher,” la ong u Bah Blah.
Haba pynsngew ba ka jingjia ha Manipur ka dei kaba la pun la slem bah, utei u nongïalam u la ong ba kane baroh i-kumba ka dei kaba la da pynkhreh bha ban beh krad ïa ki ’riewlum na ka jaka ba ki khot ka ïingsah – kaba la pynheh pynsan ïa ki ha pneh jong ka.
“Ka jingsheptieng kaba ki jaidbynriew ’riewlum hapoh ka ri ki mad ka long kaba shisha, kumta ka long kaba donkam ïa ka Jylla bad ka Sorkar Pdeng ban shimkhia khnang ban ïada kumjuh ban pynneh pynsah ïa ki,” u la ong.
Ka Synjuk haba kdew ba ka Sorkar Jylla ka la pulom ban ai ka synshar-khad-dar ka bym shah liang bad kaba khuid ba suba ha Manipur, ka la ong ba ka Sorkar ka la shah kynnoh pynban ba ka don bynta bad ka kynhun kaba la pyntyllun ïa ki kam be-aiñ ha katei ka Jylla.
“Ka jingïakynad ha Manipur kumba la ïohi da baroh ka dei ka jingthmu ban pynkhuid lut khait ïa ki dkhot jong kawei ka jaidbynriew bad kumta kiwei ki jaidbynriew ka Thaiñ Shatei Lam Mihngi ka India (ba kynthup ïa ngi ha Meghalaya) ngi don kajuh ka jingtieng kumba long lem ki ’riewlum ha Manipur,” ong u Bah Blah.
Ka SNSBH kumta ka sngew ban kyrpad ïa u Myntri Rangbahduh ka ri ban pyntreikam noh ïa ka Synshar President ha Manipur khnang ban wanrah ïa ka shong suk shong shngaiñ kumjuh ka jingshaniah ha ka Sorkar.
“Hadien ka jingpyntreikam ïa ka Synshar President, dei ban ïaid shakhmat bad ka jingtohkit kaba bniah, kumjuh ban kdew ïa ki nongpynwandur lem bad kiba donkti ha kane ka jingïakynad baroh kawei – dei ban pynshitom ruh ïa ki da kaba tyngeh,” ong ka dorkhast na ka SNSBH sha u Myntri Rangbahduh ka ri.
Shuh shuh ka Synjuk ka kyrpad ba ka Sorkar ka dei ban ai ïa ka bai lutksan sha baroh ki lanot jong ka jingïakynad khlem da kheiñ jaidbynriew khnang ba kin lah pynwandur biang ïa la ka jingim.
Nalor kane, ka la bynrap ba dei ban thaw ïa ka kynhun ba bym shah liang bad kaba lait na ki jingtuklar politik khnang ba lah ban poi sha ka jingïabeit ha Manipur.
