Shillong, Naitung 23:
Ka Synjuk Ki Kynthei Katholik, Shillong Archdiocese (SKK-SA) da ka jingsngewkhia mynsiem, ka pynrem jur halor ka jingjia ha Manipur, ha kaba ïa ki kynthei la leh bym kheiñ briew bad la sloit ïa ka burom jong ki da kaba pynïaid lyngkhuit bad leh be-ijot da ki ’riew bymman.
Kumta da kawei ka sur ka synjuk ka la pynlong ïa ka jingïalang ba kyrkieh ha ka 22 tarik mynta u bnai ban duwai kyrpang na ka bynta kito ki kynthei kiba la shah ktah ha ki ’riew bymman.
“Ngi dawa ïa ka Sorkar Kmie bad ka Sorkar Manipur ban shimkhia ïa kane ka kam, ban pynshitom jur ïa kito ki ’riew thrang snam katkum ba shong ka aiñ namar kane ka jingjia ha Manipur ïa ki kynthei ka la pynsuh jer bad pynlehraiñ ïa ka ri India hi baroh kawei – bunsien ki kynthei hi ki kylla long ki soh pdung ha ka ri jong ngi,” la ong ka kyrwoh na ka synjuk.
Ka synjuk ka la bynrap, “To ngin kynmaw ba ki kynthei ki long ka bor bad jingim jong ka Ri, wat nym ñiewbeiñ. Wat nym pynsah dak ïong ha ka jingmut jingpyrkhat ki kynthei.”
