Shillong, Naitung 24:
Ka Meghalaya High Court ha ka Lah Sngi U Blei ka la pynpaw ba ka jingkhapngiah bad ka dheng kali ka la nang sniew katba nang mih ki sngi bad ka long ruh kum ka jingruma ban rung sha Shillong ka surok Guwahati-Shillong. Ha kajuh ka por ka la ong ba ha ka por long trei bad ha ka por mynstep bad mynsngi ba long skul, ki kali ha baroh kawei ka sor Shillong ki shu neh sah hajuh.
Kane ka jingkynthoh na ka High Court ka long hadien ba ka sorkar jylla ka la ai ka kaiphod ban pyni ba ka la shim ïa ki katto katne ki sienjam lane ki sienjam kiba kan sa shim ban pynduna ïa ka dheng kali ha sor Shillong.
“Da ka jingbun ki kali bad da ka jingbym don ka jingpyrshang ban pynheh ïa ka surok bad ka jingduna ki jaka pynïeng kali, kane ka jingeh imat kam don ïa ka jubab kaba mar-mar,” la ong ka ïingbishar.
U muktiar ba ïasaid na ka bynta u nongmudui u la kdew ba watla ka sorkar ka la thied ïa ki bos ban on bad shaw ïa ki khynnah skul, ka sorkar ka khlem shim ïa ki lad ki lynti ban ai mynsiem bad jingshngaiñ ïa ki kmie ki kpa ba ki khun jong ki, kin ym lei-lei lada ki shong da kine ki bos.
Namarkata, u muktiar jong u nongmudui u la ong ba ki kmie ki kpa kim da wan shakhmat ban pyndonkam ïa kitei ki bos. U la ai jingmut ba ki briew jong ka sorkar ki dei ban leit sha manla kawei pa kawei ka skul bad kyrpad ban don jingïalang bad ki kmie ki kpa khnang ban ïoh pynsngewthuh ïa ki bad ban pynshngaiñ ïa ki ba kan ym jia eiei lada ki khun ki shong da kitei ki bos.
Ka sorkar ka la shna ïa kawei ka Mobile App, hynrei ka jingeh ka long ka jingbymshaniah ïa ki nongñiah bad ki nongïarap kiba don ha ki bos bad kumno ki khynnah skul kin ïoh jingïada na kine ki briew.
“Lada wat tang shiteng na ki kmie ki kpa kiba pyndonkam da ki kali shimet ban leit on bad shaw skul ki shim noh da ki bos kumba la wanrah da ka sorkar, yn lah ban pynduna shibun ïa ka jingdheng kali,” la ong ka High Court.
Na ka liang ka sorkar jylla ka la ong ba ka la kyrpad ïa ki nongtrei sorkar ba kin pyndonkam da kitei ki bos, hynrei haduh mynta, ym pat don than ki ban ai jubab eiei halor kane ka jingkyrpad.
Ka kaiphod na ka sorkar ka la pynpaw ba ka jingtrei ban shna ïa ka Shillong Western Bypass kan sdang ha u bnai Nailar 2023. Ka don ka jingthmu ban shna pynheh ïa kane ka surok Western Bypass khnang ban pynduna ïa ka dheng kali. Hynrei kane pat kan shimpor.
Ka High Court kan sa shong bishar biang halor katei ka mukotduma ha ka 23 tarik Nailar, 2023.
