Shillong, Naitung 24:
Ki pulit ka West Garo Hills ha ka Lah Sngi U Blei ki la ong ba ki la don kumba 200-300 ngut ki briew kiba la ïalum hakhmat ka Mini Secretariat bad kita ki briew ki la kawang maw ïa ki pulit bad ki Majistor kiba la don ha kane ka jaka.
Ha kaba ïadei bad katei ka jingjia, ki pulit ki la ïathuh ba ki la don kiba la mynsaw kynthup ïa ki heh pulit kiba dei ki kynthei. Hynrei ki la ong ba na ka liang ki pulit, ki la pyni ïa ka jinglong kaba jai-jai haduh mynta.
Ha kaba ïadei bad ki pulit pahara kiba la mynsaw, na ka liang jong u Myntri Rangbah, u Conrad K Sangma, u la pynbna ïa ka jingïarap kaba long mar T.50 hajar sha baroh ki pulit kiba mynsaw bad nalor kane, baroh ka jinglut jingsep ha kaba ïadei bad ki dawai dashin bad ka jingsumar, yn lut na ka pla jong ka sorkar.
