Shillong, Naitung:
Ka jingseng kam lajong ym tang ba ka ai jingmyntoi ïalade shimet, hynrei ka plie lad plie lynti ruh ïa kiwei ki samla wad kam ba kin ïoh kam bad kumjuh ruh, ka ai mynsiem ïa ki samla ba kin leh ïa kaei kaba ki sngewtynnad lane ïa kaei kaba ki kwah da kaba ki ïeng ha la ki jong ki kjat.
Na ka liang U Nongsaiñ Hima, u la ïoh ban ïakren bad kawei ka samla ïa kaba la tip kyrteng kum ka Iba Malai, kaba na ka thaiñ Ri Bhoi District, kaba dei kawei na ki samla kaba ju pynwandur ïa ki jaiñ bad kaba don ïa ka brand kaba la ai kyrteng ka ‘Kiniho’.
Katei ka samla ka dei kaba la ïohpdiang ïa ka khusnam ‘Customers Favourite Handloom Product’ jong ka Ateliers Meghalaya Award 2023 na u Myntri Rangbah ka jylla, u Conrad K Sangma bad na u Myntri ka tnad kam jngoh kai pyrthei, u Bah Paul Lyngdoh. Ïa katei ka prokram la pynlong da ka tnad jngohkai pyrthei jong ka sorkar jylla ha ryngkat bad ka Meghalayan Age Limited ha ka sngi 21 tarik u Naitung, 2023 ha Courtyard by Marriott Shillong.
Ka samla Iba Malai ka la ïathuh ba ki jaiñ na ‘Kiniho’ ba la pynwandur da katei ka samla ki dei ki jait jaiñ kiba la shna kyrpang da u ksai ryndia bad la seng ïa katei ka ‘Kiniho’ ha u snem 2016 da ka jingïatreilang bad ki nongthaiñ kiba na Umden.
“Nga sdang ïa kane ka kam ha ka snem 2016 namar ba nga kwah ban ïatreilang bad ki briew lajong ha Bhoi kiba pynmih ïa kane ka jaiñ ryndia namar ka jaiñ ryndia ka dei ka jaiñ kaba kongsan bha ha ka riti ka dustur ka jong ngi”, la ong ka samla Iba.
Ka samla Iba ka la ong ba kane ka jingseng kam jong ka, ka long ruh ban ai kam ïa ki briew lajong bad ha kajuh ka por ban pynneh pynsah ïa ka rukom thaiñ jingthaiñ.
Katei ka samla ka la ïathuh ba ka la shim ïa u skum ban pynmih hi ïa u ksai bad shet rong bad hadien kata yn sa thaiñ pat ïa ki jaiñ bad ïa kitei ki skum khñiang la shim hi da ki briew napoh Ri Bhoi.
Ka samla Iba ka la ïathuh ruh ba ha ka por ba ka la seng ïa katei ka kam lajong ka la mad ïa shibun tylli ki jingeh, hynrei kham hadien habud, da ka jingkyrshan lang jong ki tnad sorkar bapher bapher bad lyngba ki skhim ba la ai da ka sorkar, ka la lah ban bteng ïa katei ka kam jong ka.
“Ki don ki jingeh kiba bun kiba nga ïakynduh la ka long ha ka liang ka ïew lane ha ka liang ka pisa ka tyngka namar nga la sdang nalade”, la ong ka samla Iba.
