Shillong, Naitung 24:
U Deputy Commissioner ka West Garo Hills ha ka Lah Sngi U Blei u la ai hukum ban pynjari da ka korphiw naduh ka por 9 baje mynmiet haduh 5 baje mynstep ban teh lakam ïa ka shongsuk shongsaiñ ha Tura hadien ba ka la mih ka jingshah kawang maw ka shlem treikam u Myntri Rangbah, Conrad K Sangma, ha Dakopgre, Tura, ha u paidbhur katba ka jingïalang hapdeng u Conrad bad ki seng ka dang ïaid.
Ha ka hukum, u Deputy Commissioner Jagdish Chelani, IAS, u la ong ba ka la don ka jingïalang hapdeng u Myntri Rangbah bad ki kynhun kiba la pyrshah ïa ka Roster System bad kiba la dawa ban pynlong ïa ka Tura kum ka nongbah ka Meghalaya ha ka por tlang. Kane ka jingïalang ka la long ha shlem treikam u Myntri Rangbah.
Hynrei u la ong ba katba ka jingïalang ka dang ïaid, ki la don ki runar kiba la pynkulmar shabar jong katei ka jaka ba la pynlong jingïalang.
Ban teh lakam ïa ka suk ka saiñ, u Deputy Commissioner u la mana ïa ka jingïalum palat 5 ngut ki briew ha kano kano ka jaka paidbah ne shlem treikam jong ka sorkar. Ka korphiw ha baroh kawei ka sor Tura kan treikam naduh 9 baje mynmiet haduh 5 baje mynstep bad la mana ban pynsangeh ne byrngem ïa ki kali sorkar ne ki babu sorkar.
Shuh shuh la mana ban rah ïa kino kino ki tiar pynmynsaw ha met bad ïa ki dukan die kyiad yn hap ban khang ha ka 25 bad 26 tarik Naitung, 2023.
Ki Petrol Pump lashai ka sngi kin khang katba ha ka 26 bad 27 tarik Naitung, yn plie naduh 9 baje mynstep haduh 2 baje mynsngi hapdeng ka jingpahara jong ki pulit. La mana ruh ban die palat 10 litre ka umphniang kali lait noh tang ïa ki kali ki Majistor bad ki pulit. La hukum ruh ïa baroh ki karkhana ba kin thep ïa ki shaka kali shapoh dukan.
