Nongstoiñ, Naitung 24:
U Myntri ka tnat pule puthi ka Sorkar Jylla, Rakkam A Sangma ha ka Lah Sngi U Blei jong ka taïew u la ïoh ban plie paidbah noh ïa ka Synod College Nongstoiñ.
Katei ka kolej kan ai ïa ka jinghikai na ka bynta ki under graduate course ha ka Art Stream.
U Myntri haba kren kum u kongsan ha katei ka sngi u la ai khublei ïa ki nongseng ïa katei ka kolej. U buh ruh ka jingkyrmen ba katei ka kolej kan ai ka jingshakri kaba paka ïa ki samla pule ka dong bad ka thaiñ.
U la kyntu ruh ïa iwei-pa-iwei ba kin shim ïa ka jingkitkhlieh na ka bynta ban pynlong ïa ka Meghalaya kum ka Jylla kaba bha tam ha ka liang ka pule puthi. Shuh shuh u la bynrap ruh da kaba ong, “Ka lynti kaba bha tam ban shakri ka long ba kam dei ba ngin shu bthah lane hukum ïa kiwei, hynrei dei ban ïa ai mynsiem iwei-ïa-iwei pat.”
Nalor kata, u Rakkam u la pynpaw ruh ïa ka kyrmen ba ki khynnah ki ban pule nyngkong ha kane ka kolej kin long ki nongthoh ïa ka khana-pateng (history) jong ka kolej bad kin long ruh ki bynta ha ka khana-pateng jong ka kolej.
Shuh shuh u la ai khublei ruh ïa ki Missionary na ka bynta u synñiang jong ki ha kaba ïadei bad ka pule puthi ha ka jylla bad ka ri baroh kawei.
Halor ka National Educational Policy kaba la sdang ban pyntreikam ha ka jylla bad ha North Eastern Hills University, u Rakkam u la ïathuh ba ka jingthmu ba kongsan jong ka NEP ka long ban pynkylla ïa ka India kum ka Global Knowledge Center.
Ha katei ka sngi nalor u kongsan, la donlang ruh u Bah Gabriel Wahlang MLA Nongstoiñ kum u symbud kongsan, u Bah HM Shangpliang, nongaibuit ka tnat pule puthi ka Sorkar Jylla, u Pastor WP Marbaniang Moderator ka KJP Synod Sepngi, Rev L.P Nongkseh, Secretary KJP Synod Sepngi, Rev. ER Kharkrang Senior Executive Secretary KJP Synod, Rev. S.I Iawphniaw, Chairman CED KJP Synod, Dr. RM Lyngdoh, Principal Synod College Shillong, Rev. SS Majaw President Governing Body, Rev. RT Shangdiar, Executive Secretary KJP Synod Sepngi, Rev. Dr. SI Iawphniaw, Dr. M Rani, Vice Principal Synod College Shillong bad kiwei kiwei.
