Tura, Naitung 24:
Hadien ka jingkulmar kaba la jia shabar ka Chief Minister’s Office (CMO) ha Tura ha ka janmiet Lah Sngi U Blei, u Myntri Rangbah ka Jylla, u Conrad K. Sangma u la maham tyngeh ba ki pulit ki don lut ïa baroh ki dur khih ba la dep ring bad ki jingtip ba bniah jong kito kiba pynshit ïa ka jingkulmar.
U Sangma u la kular ruh ban leh da kaba tyngeh katkum ka aiñ pyrshah ïa kito kiba donkti ha katei ka jingjia.
Katba u Myntri Rangbah u dang shong jingïalang bad ki nongmihkhmat ka ACHIK bad GHSMC ha CMO Tura, u paidbhur u la sdang ban kawang maw sha ki pulit bad ka ophis jong u, kaba la ïalam sha ka jingmynsaw jong katto-katne ngut ki pulit.
Halor katei, u Sangma u la ong, “Kane ka jingjia kaba la jia mynta ka sngi ha Tura, shabar ka CM Secretariat bad ka ophis Commissioner of Divisions ka long kaba sngewsih.”
Ha kajuh ka por, u la pynrem jur ïa katei ka jingjia bad ong ba kaei kaba la jia ha ka janmiet Lah Sngi U Blei imat ka lah ban dei ka buit jong ki kynhun kiba khwan myntoi.
“Kaei kaba ngi la ïohi i kumba ka la dei da kawei pat ka buit jong kiwei pat ki briew. Kumba nga la ong, wat ki kynhun seng kiba don bynta ha ka jingïakhih shah thngan ki la dep pynshai ba kim don bynta eiei bad kane bad kim don jingtip ruh shaphang ki briew kiba donkti ha katei ka kam,” la ong u Myntri Rangbah.
