Shillong, Naitung 24:
U Archbishop Andrews Thazhath, President ka Catholic Bishops’ Conference of India (CBCI) ha ryngkat ka jingsynran lang u Archbishop Dominic Lumon, Archdiocese ka Imphal, Manipur, Fr. Jervis D’Souza, Deputy Secretary General, CBCI bad Fr. Dr. Paul Moonjely, Executive Director, Caritas India ki la leit ban jngoh ïa ki jaka ha Manipur kiba don hapdeng ka jingïakynad.
Ka kynhun ka la leit jngoh ïa ka Kakching, Sugnu, Pukhao, Canchipur, Sangaiprou, bad kiwei-kiwei bad sakhi ïa ka jingjulor kaba jur jong ki ïing ki sem, ki jaka mane, skul bad ki shlem ai jinghikai ha ki jaka bapher-bapher ha shi lynter jong ka jingïaid lynti.
Ka kynhun ka la synñiang ruh ïa ki tiar donkam sha kito kiba la kylla phet wir kiba shong ba sah ha ka ‘Relief Camp’ jong ka Indoor Stadium, Kakching bad plie ruh ïa ka ‘Medical Camp’ ha Pukhou. Sugnu, ha kaba la ju shong ju sah da kumba 1000 tylli ki longïing.
“Ki ïing ki sem bad ki jingdon-jingem jong ki, ki la shah pynjulor. Ka St. Joseph’s Higher Secondary School bad Parish kaba ju ai jingshakri ha ka liang ka pule-puthi, imlang-shalang bad kam pynroi sha baroh ki jaidbynriew ba kynthup ïa ki Kuki-Zo, Naga, Meitei lem bad kiwei-kiwei ka la kylla dpei lut,” la ong ka kyrwoh na ka PRO, CBCI.
Ka kynhun ka la ong ruh ba ka Holy Redeemer Church ha phyllaw jong ka skul Katholik kaba ha Canchipur, ka Regional Pastoral Training Centre bad St. Paul’s Parish ha Sangaiprou ki la shah pynjulor lut.
“Ka pang ka mynsiem ban ïohi ba kine ki jaka kim don briew shuh bad i kumba kin ym don shuh kiba shong ba sah hadien habud lada ka jingbym shaniah bad ka jingtieng ka ïai bteng,” la ong ka kyrwoh.
Ha kajuh ka por, ka kyrwoh ka la pynpaw ka jingsngewkhia halor ka jinglong-jingman bad ka lawei jong kito kiba la phet noh na kine ki jaka kumjuh ki khun ki kti jong ki hapdeng jong kine kiei-kiei baroh.
“Ngi la ïoh lad ruh ban jngoh ïa katto-katne ki skul bad jaka sah ha kaba ngi la sakhi ïa ki jingkhuslai bad ka jingjynjar jong ki khynnah, ha kawei ka liang kaba la pynlong ïa ngi ban ym don jubab ha kum kane ka por halor kumno ngi lah ban tei biang pat ïa kine ki jaidbynriew bad ki shlem ai jinghikai,” la ong ka kyrwoh.
Ka Caritas India, ka tnat treikam ka CBCI ka la leh katba lah ban phai khmat sha kane ka jingjia naduh kaba sdang lyngba ki lad jingïarap, ha kajuh ka por ban kyrshan ïa ki ‘Relief Camp’ ha ryngkat ka jingïasnohktilang bad ka Catholic Relief Services (CRS) bad ka Diocesan Social Services Society (DSSS), Social Service Wing jong ka Archdiocese ka Imphal.
Haduh mynta, ka Caritas India ka la pynbiang ïa ki lad jingïarap kiba la kot sha ka T.3 klur.
Nalor kane, ka CBCI, lyngba ka Balang ha India ka la pynlong ruh ïa ki prokram jingduwai, ki jingïaid paidbah na bynta ka suk ka saiñ, ban lum ïa ki jingdonkam nalor kiwei-kiwei ban kyrshan ïa kito kiba shah ktah na ka jingïakynad.
“Ngi sngewsih kthang halor ka jinglong-jingman ha Manipur. Ngi pynrem jur ïa ki jingthombor ha baroh ki liang khamtam ha ki shlem ai jinghikai, jaka mane, ki kynthei bad ki khyllung-khynnah. Ngi khuslai ruh halor ka jingkuman bad ka jingbym shimkhia jong ki bor ba dei khmih ha ka ban tehlakam ïa ka jingïakynad,” la ong ka kyrwoh na ka PRO.
Shuh shuh ka CBCI ka kyrpad ïa ki bor synshar ban pynneh-pynsah ïa ka jingngeit niam bapher-bapher hapoh ka ri, ban pynkhlaiñ ïa ki nongrim ka Riti Synshar bad ban wanrah biang ïa ka shong suk shong shngaiñ hapdeng ki jaidbynriew bapher-bapher.
“Ngi khot ngi wer ïa baroh kiba don ka jingsngewkhia ban ïaid shakhmat bad ka jingïakren bad pynleit jingmut ha ka roi ka par na bynta baroh ki bynta jong ka imlang-sahlang khnang ba ka jingsuk kan wanphai ha India khamtam ha Manipur,” la pynkut ka kyrwoh.
