Shillong, Naitung 24:
Ka Meghalaya EMRI Workers Union (MEMRIWU) kaba dei ka seng ki nongtrei ban ai jingshakri lyngba ka 108 Ambulance ki la pynpaw ka jingdiaw namarba naduh ba ka Sorkar ka la buh da ka NHM ban khmih ïa ka jingai jingshakri ki 108 emergency service ambulance, ki la don shibun ki jingduna, ym kum mynshwa ha ka por jong ka GVK EMRI katba ka dang don ban ai jingshakri.
Ka GVK Emergency Management & Research Institute (EMRI) ka dei kaba la shimti nyngkong ïa ka jingai jingshakri lyngba ki Ambulance da kaba leit kylleng ki jaka ban kit ïa kiba pang ba shitom bad kiba donkam kyrkieh ïa ka jingsumar.
Kumta ki nongïalam ka MEMRIWU ki la ïakynduh ïa ka Myntri ka tnat ka koit ka khiah ka Dr. Ampareen Lyngdoh ban ïakren halor kine ki jingduhnong jong ki nongtrei bad pynsngew ruh ïa ki mat jingdawa na ka bynta ban ïada ïa ki nongtrei ka 108 emergency service.
Haba kren sha ki lad pathai khubor hadien ba la ïakynduh ïa ka Kong Ampareen, u President ka MEMRIWU, Bah Roykupar Kharraswai u la ong ba ka Myntri Sorkar kan sa ïakren bad ki bahalor kiba dei peit ïa ki nongtrei na ka bynta ban pynbit pynbiang ïa ki jingdonkam jong ki.
Na ka liang ka seng ka la pynsngew ruh halor ki jingduna ha ka jingïohnong jong ki nongtrei ka 108 emergency service.
“Naduh ba ka Sorkar ka la buh da ka NHM ban khmih ïa ka 108 emergency service, ki la don shibun ki jingduna, ym kum mynshwa ha ka por ba ka dang don ka GVK,” u la ong.
Lah ban pynkynmaw ba dei kine hi ki nongtrei kiba dawa ba ka Sorkar ka dei ban weng noh ïa ka GVK EMRI bad dei ban shimti noh ka Sorkar kane ka tnat ai jingshakri ha ka liang ka koit ka khiah.
“Naduh ba weng ka sorkar ïa ka GVK EMRI bad buh da ka NHM, ki nongtrei ki la duh lut ïa ki jingïoh jingmyntoi kum ka health insurance, Provident Fund, jingshim shuti bad kumta ter ter,” u la ïathuh.
Kumta kane ka seng ka la pynpaw biang hakhmat ka Myntri ba ka Sorkar ka dei ban shimti bad pynïaid hi noh ïa kane ka shlem treikam, hynrei na ka liang ka Kong Ampareen ka la pynpaw ba watla kane ka shlem treikam ka dei ka kompani, na ka liang ka Sorkar kan peit na ka bynta ka hok jong ki nongtrei kiba don hapoh jong katei ka shlem treikam, khamtam na ka bynta ki longkmie kiba armet ba kin ïoh ïa ka hok ban shim shuti namar ka jingarmet kam pher la ka dei kaba dang shu sdang ne kiba la jan kha.
Ka Kong Ampareen ka la ong ruh ba kan sa ïakren bad ka NHM ban peit ïa ki jingdawa jong ki nongtrei ban ïada ïa ki kam kiba ki trei wat lada ka wan da kawei ka kompani ban shimti ban pynïaid.
