Shillong, Naitung 24:
Ka Hynñiewtrep National Youth Front (HNYF), East Khasi Hills District ka la ong ba ka tnad pulit kaba pynïaid kali haba ka bat ïa ki kali tah ïit ïong kiba duna dor ka dei ban bat lang ruh ïa ki kali rem dor namar kumba ka long la ïohi ba ka la bat tang ïa ki kali kiba duna dor.
Haba kren sha ki lad pathai khubor ha ka Lah Sngi U Blei, u President ka HNYF Shillong Region, Bah Bless Dkhar, u la ong ba ka seng ka kwah ba ka tnad pulit haba ka pyntreikam ïa katei ka aiñ ka dei ban long salonsar ïa baroh khlem da leh shiliang khmat ïano ïano la ki dei ki kali kiba rem dor ne ki kali kiba duna dor namar ki ju don ki por ba ïa ki kali ba rem dor, ka tnad pulit kam nud satia ban bat, hynrei ka la bat tang ïa ki kali kiba duna dor.
Wat la na ka liang u Bah Dkhar u la ai ka jingïaroh ïa ka tnad pulit kaba la bat ïa ki kali kiba tah ïit ïong namar ba kan long ka jingshngaiñ ïa u paidbah hi, hynrei u la ong pat ba kane ka jingleh kam dei ban noh shiliang ïano-ïano.
“Ngi kwah ban kylli pat na ka sorkar ba hato ka la pynmih ne em ïa ka jingthoh bad ka ai hukum ne em ïa ka tnad pulit ba kan leh ïa kane ba haba ka bat ïa ki kali ha surok kam dei ban bat lymmuh, namar teng teng ïa ki kali baheh bahaiñ bad kiba rem dor kim nud ban bat”, la ong u Bah Dkhar.
U Bah Dkhar u la ong ba na ka liang ka seng kan sa peitngor bha halor kane. Lada ka seng ka ïohi ba ka don ka jingleh shiliang ha kaba bat ïa ki kali, kan sa mih sha surok ban ïa bat lang ïa kitei ki kali kumba ka la ju leh teng ha kaba ïadei bad ka jingbym teh ïa u ‘seat belt’ da ki nongñiah kali sorkar.
“Na ka liang jong ka seng ngin peitngor bha ïa kane bad lada ka long leh shiliang, ngi ruh ngin mih ha surok ban ïa bat lang, ngin mih ma ngi ha surok lada ka long noh shiliang kane ka tarajur”, la ong u Bah Dkhar.
