Shillong, Naitung 24:
Hadien ka jingkhlad noh jong uwei u samla na ka jingkynnoh ba ka la don ka jingleh bym suidñiew jong ki doktor ka North Eastern Indira Gandhi Regional Institute of Health & Medical Sciences (NEIGRIHMS), ka Myntri ka tnat ka Koit ka Khiah ka jylla, Kong Ampareen Lyngdoh ha ka Lah Sngi U Blei, ka la pan ïa ka kaiphod na katei ka jaka sumar halor ka jingïap u samla, uba la wan shah sumar ha katei ka jaka na ka jingmynsaw ïatyngkhuh kali ha Damsait ha ka Sngi U Blei.
“Nga la don ka jingtip halor ka jingkynnoh jong ka jingbym shym la ai jingsumar ïa uba mynsaw na ka jingjia aksiden ha NEIGRIHMS bad ha kaba ïadei bad kane, nga la pan ka kaiphod na u Director jong kane ka hospital,” la ong ka Kong Ampareen.
“Nga la phah ka shithi sha u Director ka NEIGRIHMS ban pan ïa ka kaiphod ba ngan sngewthuh kham bha ïa kaei kaba la jia baroh,” la ong ka Myntri bad bynrap “Nga phah ïa ka jingsngewlem sha ki bahaïing kiba la duh noh ïa la u baieid bathoiñ bad ha kajuh ka por nga kular ïa kane ka longïing kaba la mad ka jingsngewsih ba ngan tohkit bad ngan kylli ïa kaei kaba jia.”
Kum ban shu pynkynmaw, ha ka Sngi U Blei ka la mih ka jingkulmar hapoh ka Emergency Unit jong ka NEIGRIHMS hadien ba uwei u samla u la khlad noh na ka jingmynsaw.
Ki bahaïing une u samla ki la kynnoh ba katei jaka sumar ka la leh bym suidñiew ïa ka jingsumar bad ba ym shym la don doktor satia hapoh ka hospital ha kaba la shu ieh ïa une u samla ban thiah mynsaw khlem ka jingsumar haduh san kynta.
Haba kylli, ka Myntri ka la ong ba kam don bor satia ban phah ïa kano-kano ka jingtohkit halor kane ka jingjia bad haba pynpaw ba ka NEIGRIHMS ka dei jong ka Sorkar Pdeng, ka Kong Ampareen ka la ong ba ka dei pat ka kamram jong ka Sorkar Jylla ba kan don ki khmat bad ki shkor halor kane ka hospital.
Ka la pyntip ruh ba kan sa wad ïa ka jingshisha la ka dei ne em ba ym shym la don doktor ha katei ka por ba wanrah ïa une u samla ba mynsaw.
