Shillong, Naitung 24:
Ka jingbym pat leh eiei ka Executive Committee ka Khasi Hills Autonomous District Council (KHADC) naduh ka por jong ka EC barim ka la nang pynsahteng ïa ka kam ban pynbeit thymmai ïa ka Assam and Meghalaya Autonomous Districts (Constitution of District Councils) Rules, 1951 lane AD Rules.
Katkum ka tyllong khubor ba ïajan bad ka tnat District Council Affairs (DCA) la ong ba na ka liang ka Sorkar Jylla lyngba ka tnat DCA ka la phah ïa ki mat kiba donkam ban khmih bniah biang da ka KHADC haba ïadei bad ka jingpynbeit thymmai ïa ka AD Rules bad ïa kane la phah naduh ka 18 tarik Ïaïong, 2023.
Ki mat kiba donkam ban pynbeit ha ka AD Rules ki kynthup ïa ki rukom lum khajna kiba don naduh mynshwa hynrei mynta kim don shuh kum ka khajna haba ïadei bad ka jingïaid lynti ki hati, ki mar poh khyndew kum ka umphniang bad ka hoe-tax lane ka khajna haba ïadei bad ki ïing nalor ka jingpynneh sah ïa ka kyrteng Sub Division kum ïa ka Nongstoiñ, Mairang, Mawkyrwat bad kiwei kiwei wat la kine ki jaka ki la dei mynta ki District.
La ong ba ki mat kiba la phah da ka tnat DCA sha KHADC ki la shu sahkut hapoh ka Executive Committee naduh u Ïaïong haduh mynta khlem pat leh ei ei, wat lada kine ki mat kiba kdew ka tnat DCA ki dei kiba suk ban pynbeit noh khnang ba ka KHADC kan ïoh phah biang sha ka Sorkar Jylla na ka bynta ban mynjur u Lat ïa ki kyndon kiba la pynkylla ha ka AD Rules.
Kiwei kiwei pat ki jingtyrwa ban pynkylla ïa ka AD Rules ki kynthup ruh ïa ka jingtyrwa ba u Lat u dei ban thung da u Protem Chairman ban pynshai ïa kiba shahjied thymmai kum ki dkhot ka Ïingdorbar KHADC namar haduh mynta, ïa ki dkhot kiba shahjied thymmai la pynsmai da u Deputy Commissioner lane District Council Judge katkum ka jingaibor jong u Lat.
La ong ba ka Legislative Wing ka KHADC hadien ba la ïohpdiang ïa kitei ki mat kiba kdew da ka DCA ka la phah noh kloi sha ka Executive Committee jong ka KHADC naduh ka 21 tarik Ïaïong, 2023 ban leh ïa kaba donkam.
