Shillong, Naitung 24:
Ha ka Lah Sngi U Blei ka jaka lehniam jong ki Hindu kaba la tip kum ka Shiv Temple kaba don ha Mahadev Khola ka la shah thombor ha ka kynhun ki ’riew runar, kiba la shoh ruh wat ïa ki ’riewngeit katba ki dang wan lehniam ha kane ka jaka.
Katkum ka khubor ba la ïoh lum, la ong ba kane ka jingjia ka la jia ha ka por 12 baje eiei. Na ka liang jong ki pulit mynta ki dang tohkit ïa kane ka jingjia bad dang shong bishar ïa ki dur-khih (video) ba la ïoh ring lyngba ki kor CCTV ban lah pynithuh ïa kine ki runar.
Namar ka jinglehniam Sawan jong ka Lah Sngi U Blei kaba lai, ki la don bun ki ’riewngeit kiba wan sha kane ka jaka lehniam. Hynrei kyndit-kynsan, ki ’riew runar ki la wan rung sha kane ka jaka lehniam bad shu shoh naphang ïa ki ’riewngeit kynthup ïa ki nongshong dukan hajan kane ka jaka mane blei.
La kynnoh ruh ba kine ki runar ki la knieh bad shoh ïa ki ’riewngeit kynthei kiba wan ban tyrwa um sha u blei ha kane ka jaka ha kaba bun ngut ki la mynsaw.
La ong ba hadien kane ka kam thombor, kine ki runar ki la phet krad na kane ka jaka bad ki bor pynïaid kane ka jaka mane blei ki la pyntip mar-mar sha ki pulit ba kin wan tohkit.
Ki bor pynïaid jong kane ka jaka lehniam ki la pyntip ruh ba kum kine ki kam thombor ha kane ka jaka mane blei ka dei kaba la jia bunsien.
Kumta ki pulit ki la pynrung case halor kane ka jingjia bad ka jingtohkit ka la ïaid shakhmat ban ithuh ïa ki briew ba donkti bad ban kem ruh ïa ki.
Ha kawei pat ka khubor ba la pyllait da u Superintendent of Police ka East Khasi Hills, la ong ba ha ka por 12 baje mynsngi, ka la don ka jingshah thombor jong kawei ka dukan ha Mahadev Khola.
Ka kyrwoh khubor ka la ong ba uwei u briew uba la wan sha Mahadev Khola, uba la pan ïa ka jingdih ‘Amul Kool’ na kawei na ki dukan kaba don ha kane ka jaka bad ong ba un sa siew pisa kham hadien. Hynrei, hadien ba ka trai dukan ka la kyntait, une u briew u la kawang da u snepkor sha ka.
La ong ba ha ka por ba u khun jong ka (21 snem) haba u la wan ban tuklar ïa kane ka kam, la mih ka jingïajrong kti. Hadien kumba shiteng kynta eiei, une u briew u la wan biang ryngkat bad kiwei saw ngut bad ban thombor ïa kane ka briew lem bad u khun jong ka kumjuh ban tuh ïa ka pisa na ka dukan bad ban phet krad na kane ka jaka.
Kumta ki pulit na Jhalupara OP hadien ba ïoh jingtip ki la wan bran-bran sha kane ka jaka ban pynlong ka jingtohkit. Kane ka briew lem bad u khun ki la mynsaw malu-mala bad hadien ba la dep ban eksamin bad pyntah dawai la pyllait noh ïa ki.
Ha kaba ïadei bad kane ka jingjia la pynrung case hapoh ka thanat Lumdiengjri bad na ka liang ki pulit ki dang leh katba lah ban thwet bad kem ïa kine ki briew.
