Jowai, Naitung 24:
Ka Kiang Nangbah Government College Students’ Union (KNGCSU) ka la ther tyngeh ïa u Symbud Myntri Rangbah ka Jylla, Bah Sniawbhalang Dhar uba sngewkhia ïa ka jingeh ka Kiang Nangbah Government College, ka kolej sorkar kaba rim tam ha Rilum Jaiñtia tang ha rynsan paidbah.
U nongïalam ka KNGC Students’ Union, u samla Precioustar Sten ha ka jingïadonlang ki dkhot ka seng haba kren sha ki lad pathai khubor ha ka 24 tarik Naitung, u la kynthoh ïa ka jingkren u Bah Sniawbhalang Dhar ha ka jingïalang pynkut ïa ka lyngkhuh snem ba 10 ka Ummulong Presbyterian College ha ka 21 tarik Naitung.
Kane ka jingkren jong u Bah Sniawbhalang, ka la pynshrai ïa ki samla pule ka Kiang Nangbah Government College namar ba ka kam jong u, bad ka jingkren jong u, kam ïadei haei-haei bad kam don kano-kano ka roi ka par ha kane ka kolej.
Ka Student Union ka la kynthoh ïa ka jingkren jong u, kaba u ong, ba ki samla pule kiba leit klas ha Kiang Nangbah ka long kumba leit ïew bad ym i kop kum kiba leit pule.
Ka Students’ Union ka pyngsngew ba kane ka kolej ka dei ka kolej sorkar kaba rim tam ha rilum Jaiñtia, hyrnei ka jingkren jong u Bah Sniawbhalang ba u sngewkhia ïa ka kolej kam ïahap satia bad ka jingkren bad ka kam jong u bad ka dei ka kolej kaba shah leh kmie-nah ha ka sorkar.
Ki la ong ruh ba kum u nongthaw aiñ kane ka thaiñ u dei ban thep admission ha Kiang Nangbah Government College khnang ba un sngewthuh ïa ka jingeh bad um dei ban shu kren pyllait jynhaw.
