Shillong, Naitung 24:
Ka jingpyntrei kam ïa u ‘smart meter’ lyngba ka Revamped Distribution Sector Scheme (RDSS) kan sa sdang noh ha ki ar bnai ban wan ha kaba ka thong ban pyndait ïa u smart meter ka dei ha ki 4.6 lak tylli ki longïing.
Haba ïakren bad u Chairman-cum-Managing Director ka MeECL, u Sanjay Goyal u la ïathuh ba ka Sorkar Pdeng ka la pyllait ïa ka skhim RDSS ha baroh kawei ka ri ka long ban pynbha ïa ka rukom sam bording ilektrik bad lyngba kane ka skhim la mang ruh ban pyntreikam ïa u ‘smart meter’.
U Goyal u la ong ba ka ‘tender’ na ka bynta ban pyntreikam ïa u ‘smart meter’ ka la don ha ka bynta ban pyndep noh bad ha ki ar bnai ban sa wan, ka jingpyntreikam kan sa sdang noh.
U la ong ba ki paidbah kiba pyndonkam bording ilektrik kim donkam ban siew na ka bynta u ‘smart meter’.
Nalor kata, u la ong ruh ba kan sa don ka jingbatai ban pynsngewthuh shaphang u ‘smart meter’ bad ki jingmyntoi lada pyndonkam.
U Goyal u la ong ba kaba kham don jingeh ka dei ka jingduna mobile network bad ki kontraktor kiba dei ban pyndait ïa u ‘smart meter’ ki hap ban ïakren bad ki kompani ba pynbiang network khnang ba kan nym don jingthut haba pyntreikam ïa u smart meter, khamtam namarba donkam ruh ban pyntreikam ïa ka mobile app ha kaba ki paidbah kin ïoh jingtip kaba tikna haba ïadei bad ka rukom kheiñ ïa ka bai pyndonkam bording ilektrik. Lyngba ka mobile app yn sa lah ban tip ruh katno la pyndonkam ïa ka bording kaba paw ha u ‘smart meter’.
Shuh shuh u Goyal u la pyntip ba u ‘smart meter’ ba la shna u dei uba leh da ki kompani kiba don ha India bad ïa u smart meter la dep pynshisha ruh ha laboratory.
U Goyal u la ong ba ka long kaba donkam eh ban pynbha ïa ka rukom sam bording ilektrik sha ki paidbah bad ki paidbah kiba pyndonkam ruh ki dei ban pyndonkam bha khlem da pynsyrwa kai ïa ka bording ilektrik.
Kum ban pynkynmaw, ka Sorkar Pdeng ka la pyllait paidbah ïa ka skhim RDSS na ka bynta ban pynduna ïa ka jingduhnong ki kompani pynmih bording ilektrik ha ka ri, bad ïa kane ka jingduhnong la tip kum ka Aggregate Technical & Commercial (AT&C) losses kaba donkam ban pynhiar sha ka 12-15% bad ban pynhiar ruh ïa ka Average Cost of Supply (ACS)-Average Revenue Realised (ARR) shaduh nod ha u snem 2024-25.
Lyngba ka RDSS, la mang 20.46 klur tylli ki pre-paid smart meter, 54 lak tylli ki smart DT meter bad1.98 lak smart feeder meters.
Mynshwa, la mang ban pyntreikam ïa u smart meter lyngba ka jingbei pisa ka ADB ha ki 1.8 lak tylli ki longïing ha Meghalaya, bad mynta pat lyngba ka RDSS yn pyndait ïa u smart meter ha ki 4.6 lak tylli ki longïing.
