Nongstoiñ, Naitung 25:
Ka Ri Khasi Sepngi Federation (RKSF) Sengkmie ha ka sngi Nyngkong ka taïew ka la aiti ïa ka dorkhas sha u Rakkam A Sangma uba dei u Myntri ka Sorkar Jylla uba khmih ïa ka tnat Border Area Development, ka tnad pule puthi bad kiwei halor ki katto katne ka mat na ka bynta ka jingmyntoi ki paidah nongshong shnong ha ki thaiñ khappud bad ba un shimkhia ban pynsngew ruh sha ka Sorkar Jylla.
U President ka RKSF samla Mawkordor Kharsyiemlieh u la ong, ha katei ka jingïakynduh ïa u Myntri, ki la aiti ïa ka dorkhas ïa kaba la buh bad pynpaw ba ka sorkar kan shimkhia ha kaba ïadei bad ki thaiñ khappud ha kaba kum u Myntri bad ka sorkar ka dei ban peit lem ïa ka roi ka par kum ki surok, ka umbam umdih, ka bording, ka pule puthi.
Shuh shuh ka dorkhas ka la pynpaw ruh ba ka sorkar kan shimkhia ha kaba ïadei bad ki jaka sumar kum ki PHC, ki Sub Center, kumjuh ruh ba kin pyllait ei haba pynrung kyrteng ïa ka khyndew kaba hap hapoh ki jaka khappud khnang ba ki paidbah kin ïoh ban shong suk shong saiñ.
Ka RKSF ka la ong ruh ba ha katei ka dorkhas la pynpaw ruh ba ka sorkar kan shimkhia noh ban pynkylla ïa ka police outpost ba pura ha Langpih.
