Shillong, Naitung 25:
U Superintendent of Police (SP), East Khasi Hills, Bah Sylvester Nongtnger u la pyntip ba ki pulit ki la ïoh ban kem noh ïa ki 3 ngut ki briew ba la kynnoh donkti ha ka jingjia ha Mahadev Khola ha kaba kawei ka longkmie ka la shah thombor ha kawei kynhun.
“Hadien ba ngi la dep ban peit ithuh bha na ki dur khih (video) ba la ring da ki kor CCTV ba la pyndait ha phyllaw jong ka jaka mane blei, ha kaba ngi la lah ban ithuh ïa ki runar kiba la donkti ha katei ka jingjia. Kumta ha ka por mynmiet ngi la pynlong ka jingkhynra bad ban ïoh kem ïa ki lai ngut ryngkat bad ar ngut ki khynnah rit,” u la ong.
U SP u la pyntip ruh ba la dep ban pynrung case ïa kane ka jingjia ha thanat Lumdiengjri bad ïa ki lai ngut ki runar yn sa leit ïalam hakhmat ka ïingkashari, katba ïa ar ngut ki khynnah rit pat yn sa leh katkum ka DGP Act.
Shuh shuh na ka liang jong u Bah Nongtnger u la pyntip ruh ba ïa ka jingtohkit yn pynïaid ha ka rukom kaba dei bad yn sa shim ki lad pynshitom katkum ki kyndon jong ka aiñ.
