Shillong, Naitung 25:
Wat lada ka jingpynbna ïa ki kyrtong kan dang bam por sa kumba san bnai eiei ban ïakhun ïa ka ilekshon MDC ban long ha u snem 2024, hynrei ki la don katto katne ngut ki kyrtong na ki konstitwensi napoh ka Khasi Hills Autonomous District Council (KHADC) ki la phah da ka jingthoh ba ki kwah ban pan tiket na ka seng Voice of the People Party (VPP).
Kum ban shu pynkynmaw ka ilekshon MDC ha KHADC bad JHADC ka ju long beit shisien san snem bad ka sngi thep vote kan dei beit ha u bnai Rymphang lada dei ban long ha u snem 2024. Kumta ki seng saiñpyrthei hapoh ka jylla ki ju pynbna ïa ki kyrtong ha ka thup kaba nyngkong ha u bnai Nohprah bad ka thup kaba ar ha u bnai Kyllalyngkot shwa ba ki kyrtong kin leit thep kyrteng.
Haba phai sha ka Voice of the People Party (VPP) kaba dei ka seng saiñ pyrthei kaba dang thymmai ka la jop haduh saw ngut ki kyrtong ha kane ilekshon MLA ba dang shu dep. Hynrei, mynta ki la don ki ’riew rangbah kiba la phah jingthoh sha kane ka seng ba ki pynpaw ba ki kwah ban ïakhun ïa ka ilekshon MDC na kane ka seng.
Kane ka jingailad ka VPP ban shah ïa ki ’riew rangbah ba kin phah da ka jingthoh ba ki kwah ban long kum ki kyrtong ha ka ilekshon MDC ka long ban bishar ïa ka jingtreikam jong u kyrtong bad ki paidbah.
Katkum ki khubor ba la ïoh lum la ïathuh ba ha Sohïong constituency, East Khasi Hills ki don kumba ar ngut kiba la phah da ka jingthoh sha ka Election Committee ka VPP ba ki kwah ban ïakhun na ka seng VPP ha ka ilekshon MDC ha u snem 2024.
Haba pynthikna ïa kane ka jingïoh lum khubor, la ïoh ban ïakren bad u Bah Batskhem Myrboh uba dei u nongai ktien ka VPP uba la ïathuh ba ka seng ka la shah ïa ki ’riew rangbah na ki konstitwensi bapher bapher kiba kwah ban phah da ka jingthoh ban pynpaw ba ki kwah ban ïakhun ïa ka ilekshon MDC na ka seng VPP.
U la ïathuh hadien ba ki ’riew rangbah ki la phah da ka jingthoh, ka shong ha ka Election Committee jong ka VPP ïano ka ibit ynda la dei ka por ban pynbna ïa ki kyrtong.
