Shillong, Naitung:
U MLA ka VPP na North-Shillong, Bah Adelbert Nongrum u la kyntu ïa ka Sorkar Jylla ban thaw da ka kynhun tohkit halor ka jingjia kaba la jia ha NEIGRIHMS ha ka Sngi U Blei kaba la ïalam sha ka jingkhlad noh jong uwei u samla.
“Ka long ka jingsngewsih kthang ba kat ka jaka sumar jong ka ‘Central Medical College’ ba ka Sorkar Pdeng ka la pynkup kyrdan kum ka ‘Institution of Excellence’ ka dang lah ban pulom ha ka kamram,” la ong u Bah Nongrum ha ka kyrwoh khubor.
U la ong ruh ba kam ïahap shuh ïa ka NEIGRIHMS ba kan dang bat ïa ka kyrteng kum ka jaka sumar (bad la dei ban weng noh) bad la dei ruh ban ujor sha ka Medical Council of India (MCI).
“Ka dei ka jingleh ka bym don ka jingkitkhlieh da ki bor pynïaid katei ka jaka sumar. Nga pynrem jur ïa kane ka jingjia kaba la jia namar ka jingthurmur bad jingbym kitkhlieh jong kito kiba don ha ka kam. Ka dei ka jingleh ka bym kheiñ briew kaba baroh ngi donkam ban pynrem,” u la ong.
Haba kdew ba wat haduh 4 kynta ym shym la don doktor ban wan peit ïa u nongpang, u MLA u la ong ba katei ka long ka jinglehraiñ ïa ka Jylla bad ka tnad ka koit ka khiah baroh kawei.
“Ka Sorkar Jylla ka dei ban tuklar bad thaw da ka kynhun tohkit kaba khlaiñ ka ban tohkit ïa kane ka jingjia. Kane ka jingjia kam ïapher na ki kam be-aiñ bad kino-kino kiba donkti ki dei ban shah pynshitom,” u la ong da kaba bynrap ba ka aiñ ka dei ban leh la ka jong ka bynta khnang ba kiba kum kine ki jingjia kin ym jia shuh nangne shakhmat.
Lah ban pynkynmaw ba ha ka Sngi U Blei, ka la mih ka jingkulmar hapoh ka Emergency Unit jong ka NEIGRIHMS hadien ba uwei u samla u la khlad noh na ka jingmynsaw.
Ki bahaïing une u samla ki la kynnoh ba ka Hospital ka la leh bym suidñiew ïa ka jingsumar bad ba ym shym la don doktor satia hapoh ka hospital ha kaba la shu ieh ïa une u samla ban thiah mynsaw khlem ka jingsumar haduh san kynta.
