Shillong, Naitung 25:
U State President ka Bharatiya Janata Party (BJP), Bah Ernest Mawrie u la bthah ïa ka Disciplinary Committee jong ka seng ban aiti ïa ka kaiphod halor kiba shah kynnoh donkti ban thombor ïa ka shlem treikam u Myntri Rangbah ka Jylla ha Tura hapoh 15 sngi.
“Ka seng kan sa pan kaiphod na ka shlem treikam ka distrik bad hadien kane, kan sa pynshitom pyrshah ïa kito kiba donkti ha kitei ki kam be-aiñ,” la ong u Bah Mawrie ha ka kyrwoh khubor.
U la ong ruh ba la bynshet kam ha ka Disciplinary Committee ban phah ïa ka kaiphod halor kito kiba shah kynnoh donkti ha katei ka jingjia hapoh 15 sngi.
Ha kajuh ka por, haba pynrem jur ïa ka jingjia ha Tura, u la ong ba ka BJP-Meghalaya kam kyrshan ïa kano-kano ka jingïakhih kaba thaw jingkulmar bad ka seng kam shym la bthah eiei sha ki dkhot ka Mahila Morcha ban ïashim bynta ha kano-kano ka jingïakhih.
“Ka BJP naduh ba la seng ïa ka kam ju kyrshan ïa kano-kano ka jingïakhih kaba thaw jingkulmar,” u la ong.
Utei u nongïalam u la ong ruh ba ka seng ka don bynta bad ka Sorkar bad kano-kano ka rai na bynta u paidbah ba la shim da ka Sorkar, ka seng kan ïeng ha syndah.
U President haba kyrpad sha baroh ba ka jingïakhih kaba thaw jingkulmar ka dei kaei-kaei ka bym lah pdiang, u la bynrap, “Ka jingthombor ïa ka shlem treikam u Myntri Rangbah ka long kaba hap pynrem bad ka BJP ka kwah ba baroh kito kiba donkti ki dei ban shah kem mardor.”
Kum ban shu kdew hangne, 18 ngut ki pulit pahara jong u Myntri Rangbah ka Jylla, u Conrad K. Sangma ki la mynsaw ha ka Lah Sngi U Blei, hadien ka jingshah lun maw ha ki paidbhur na ka jingmih kyndit-kynsan ka jingkulmar shabar jong ka jaka ba la pynlong jingïalang.
Na ka liang u Myntri Rangbah u la lum ïa ka jingïalang bad ki nongïalam seng (ACHIK, GHSMC bad kiwei-kiwei), ki nongïalam shnong bad ki ophisar ïa kaba la pynlong ha shlem treikam jong u kaba ha Tura, West Garo Hills.
Katei ka jingkulmar ka la mih haba ki paidbhur kim shym la hun satia ïa kaei kaba la mih na katei ka jingïalang, Kumta ka la pynlong ïa ki ban shim ïa u pud haduh ban lun maw sha ki bor pahara bad sha ka jaka ba shong jingïalang.
