Shillong, Naitung 25:
Ka tnad pulit ka Jylla ha ka Sngi Ba-ar ka la kren shai ba kino-kino kiba pyrshang ban synñiang ne noh jingïarap sha ka Hynñiewtrep National Liberation Council (HNLC) kin shah pynshitom katkum ki kyndon jong ka aiñ.
“Kano-kano ka jingsynñiang sha ka kynhun seng kaba la kheiñ be-aiñ – ka HNLC ka dei ka seng kaba la kheiñ be-aiñ, kin hap shim ka jingkitkhlieh na bynta kino-kino ki jait jingsynñiang ne jingïarap. Kin hap shim ka jingkitkhlieh,” la ong u Deputy Inspector General of Police (ER), Meghalaya, u Davis N.R. Marak haba kren sha ki lad pathai khubor.
Ka HNLC ha ka kyrwoh na u General Secretary, uba long ruh u Publicity Secretary ka seng, Bah Saiñkupar Nongtraw ka la ong ba ki paidbah ki lah ban noh jingïarap sha ka seng ha ka rukom jong ki jingsynñiang.
“Kumta kino-kino kiba synñiang, ïarap bad lada ngi ïoh jingtip bad lap ki sabut ba ki synñiang, ngin pynshitom katkum ka aiñ. Kumba ka long mynta, ka HNLC ka dei ka seng kaba la kheiñ be-aiñ,” la ong u Marak.
Halor ka jingmih pyrthei ba dang shen jong ka shithi dawa pisa ka HNLC, utei u heh pulit u la kubur ba katei ka long kaba shisha bad ka la mih ruh ha ki lad pathai khubor.
“U briew uba la paw kyrteng u la kyntait ïa ka jingdonkti jong u. Ha ka jingshisha u la wan mih ruh sha shlem treikam jong ngi ha ka Lah Sngi U Blei bad u la kyntait. Kumta ngi dang tohkit bniah halor kane ban lap la ka dei ne em kaba shisha ba u donkti, ne don da kiwei pat kiba la pyndonkam bakla ïa ka kyrteng jong u ban sam ïa kane ka shithi dawa pisa,” la ong u Marak.
Haba kylli la kitei ki shithi dawa pisa ki long kiba shisha ne em naba ka HNLC ka la kyntait ïa ka jingdonkti jong ka ha katei ka kam, utei u heh pulit u la ong ba ïa mynta, ka tnad kam pat lah ban shim kano-kano ka rai namar ki pulit ki dang pynlong ka jingtohkit halor kane ka bynta.
“Tat ynda ngi la tohkit bniah, ngin sa lap ïa kane…la ki dei ki shithi dawa ba shisha jong ka HNLC ne don kiba shim kabu ban pyndonkam ïa ka kyrteng ka seng. Ïa kane ngin sa lap ynda ngi la tohkit bniah,” u la ong.
Haba jubab, u Marak u la ïathuh ba u la ïoh jingtip halor ka jingsam ïa ki shithi dawa pisa, hynrei haduh mynta ym shym la don mano-mano ruh ba wan shakhmat ban ujor ejahar ha ki pulit.
“Kine ki long ki hamsaïa kiba saphriang, namar haduh mynta ym pat lah pynshisha ïa kane ka jingkynnoh. Kumta ym lah ban leh eiei ïa mynta namar ngim pat ïoh ïa ka jingujor kaba kum kata,” u la ong.
Shuh shuh u la bynrap ba katkum ki jingtip na ki tyllong khubor, ka don ka jingsam ïa ki shithi dawa pisa hynrei ym lah ban pynshisha la ki dei kiba shisha ne kiba shu shna ne don mano-mano kiba leh kamkai.
“Haba ïadei bad kito ki shithi/jingthoh ba shna hi kiba la pynsaphriang ha ki rynsan lad pathai – ka long ba la phah ïa ki haduh da ki spah sien. Ka long kaba eh ban lap ïa ka thymmei naei ka mih. Tang lada u briew uba ïoh pdiang nyngkong eh u wan sha ngi, hangta ngin sa lah ban pynshisha,” la ong u DIG (ER).
