Tura, Naitung 25:
U nongïalam seng samla ka TMC, u Richard Marak, uba la ïakhun pyrshah ïa u Myntri Rangbah ka Jylla, u Conrad K. Sangma, na South Tura konstitwensi (na ka tiket TMC) u la shah kem halor ka jingkynnoh ba u la sam pisa sha ki paidbah, kiba la shah kynnoh donkti ha ka jingkulmar kaba la jia ha ka Lah Sngi U Blei ha Tura.
Ki pulit ka WGH ki la kem kumba 22 ngut ki briew naduh hynnin janmiet ba kynthup ïa u nongïalam ka TMC.
Ha ka jingïakren jong u DGP bad ki lad pathai khubor ha Shillong, ka daw halor ka jingshah kem u Marak la kam ba ka dei namar ba u la pynshit bad sam pisa sha ki nongïakhih ban ïaid shakhmat bad katei ka jingkulmar.
Kumba ka long, u Richard dang shen u la don jingshitom ha u klongsnam bad u la koit dang ha kane ka shi bnai ba la dep.
Haba kren halor ka jingshah kem, ka kurim jong utei u nongïalam ka TMC, ka Jigame Marak, ka la kam ba u Richard um don bynta eiei ha katei ka jingjia naba u don beit bad ka baroh shi sngi ha ka 24 tarik mynta u bnai.
“U Richard um don bynta eiei naba u don beit ha ïing bad nga. Um shym la mih na ïing bad ïa kane lah ban pynshisha da baroh ba kynthup ïa ki paramarjan jong ngi. Ka daw jong ka jingpyntikna jong nga ba um don bynta ka dei namarba nga la shah puid (gall bladder operation) bad la pyllait ïa nga na Mission Hospital, Tura ha ka por 1 baje hynnin mynsngi. U la don beit bad nga naduh ba ngi poi ha ïing, te hangno kata ka jingïadon bynta jong u,” buh jingkylli ka Jigame.
Ka Jigame ka la pyntikna ruh ba lada ka jingshah kem jong u ka long tang haba ïadei bad ka jingjia kaba la jia hynnin ka sngi, kata kam don jingkylli hi ruh ba u don bynta.
“Nga la thiah aspatal ha ka Sngi Thohdieng, shah puid ha ka Sngi Saitjaiñ bad la pyllait ïa nga ha ka Lah Sngi U Blei. U la don beit bad nga bad kiba don sawdong jong ngi, ki lah ban pynshisha ïa kane,” ka la ong.
Halor ka jingïakhih shah thngan, ka la ong ba ïa kane la leh na bynta jong ka jaidbynriew baroh kawei bad ym na bynta kano-kano ka seng saiñ pyrthei. Mano-mano ruh ki lah ban ïashim bynta bad kumta kam don jingkylli ban ong ba man la kawei-pa-kawei ka seng jong ka Jylla ka la shim bynta. Ki la leit namar ka jingkwah jong ki.
Ka Jigame ka la bynrap ba hadien ba la kem ïa u Richard, ym shym la ïathuh ruh sha ka ïa ka daw halor ka jingshah kem jong u.
“Haba nga la leit sha thanat, nga la ïohi ba la set ïa u bad kylli na ki ïa ka daw. Ki la ong ba kim don jingtip namar ïa ka mukotduma la khmih hi da u SP. Ym shym la kem ïa u hynrei la shu set ïa u. Nga la lah ban ïakynduh ïa u tang hadien ba la pynbor namar ngi kum ki bahaïing hasem ngi don hok ban tip balei,” ka la ong.
Haba ïathuh halor ka jingwan kem, ka Jigame ka la ong ba baroh ki la don lut ha ïing bad ki dang ïa dih sha, ha kaba kumba 30 ngut ki pulit ki la wan ban ker tawiar ïa ka ïingsah jong ki.
“Ki la wan i kumba u dei u nongleh kam sniew ba snar bad phah ïa u ban wan bad ki. Haba u Richard u la buh jingkylli balei bad la ki don ‘warrant’ ne em ba ïadei bad ki kot ki sla, uta uba dei peit, u la tan bad ïalam noh ïa u,” ka la bynrap.
