Shillong, Naitung:
Ka shlem treikam jong ka Online Tent Service Centre kaba don ha Mawkhar ha ka Lah Sngi U Blei ka la plie bad sdang ïa ka jingai jinghikai ha kaba ïadei bad ka ‘Beauty and Wellness’ lane ka course ‘Beautician’ na ka bynta ki khynnah samla kiba naduh ka rta 15 snem shaneng.
Ïa kane ka Skill Development Program la ïatrei lang ryngkat bad ka shlem treikam jong ka Jan Shikshan Sansthan kaba hap hapoh ka jingkhmih jong ka Ministry of Entrepreneurship And Skill Development ka sorkar India.
Ha katei ka sngi la ïa don ryngkat lang ruh da u MLA ka Mawkyrwat Constituency, Bah Renikton Lyngdoh Tongkhar ryngkat bad u Director jong ka Jan Shikshan Sansthan East Khasi Hills District.
Haba ai jingkren ha katei ka sngi, u Bah Jubanlang Kharbihkhiew uba dei u Managing Director jong ka Online Tent Service Centre u la ai khublei ïa ka Ministry of Entrepreneurship Skill Development ha ka jingplie lad ka jong ka ïa ka shlem treikam jong ka Online Tent Service Centre ban pyntreikam ïa kiba bun jait ki jingai jinghikai lane ki ‘Skill Development kum ka Assistant Computer Operator, Beautician, Tailoring bad kiwei kiwei ki jait prokram jong ka Skill Development.
Kumjuh ruh u Director jong ka Jan Shikshan Sansthan ha ka jingai jingkren, u la pynshlur ïa ki khynnah samla kiba ïoh jinghikai na kine ki ‘course’ ba kin ïaineh bad tista ha ka jingshah hikai jong ka Online Tent Service Centre namar ba ka syrnod (certificate) kaba kin ïoh na ka Ministry kan long kum ka lad ban ïoh kam ïoh jam bad kumjuh ruh ban ïoh ïa ka jingïarap ban ïeng ha la ki jong ki kjat na ka bynta ka seng kam seng jam.
Katba u MLA ka Mawkyrwat Constituency haba ai jingkren, u lah ïaroh ïa u Bah Jubanlang Kharbihkhiew na ka bynta ka jingtrei shitom jong u ban kyntiew ïa ka sap jong ki samla ka ban long ruh kum ka lad ïoh kam ïoh jam lyngba ki jingai jinghikai bapher bapher ba ka ‘Center’ ka don ban ai.
Utei u MLA u la pynshlur ruh ïa baroh kiba ïa don ha ka prokram ba kin trei shitom bad ïaineh ha kiei kiei kiba rit shuwa bad u la ai nuksa ruh lyngba ka jingtrei jong u kum u ‘Entrepreneur’.
U la ïathuh ruh ba watla u long kum u MLA, hynrei u don ïa kajuh ka jingthmu kata ban shakri ïa ki paidbah bad ban kyntiew ïa ka imlang sahlang. U la ai khublei ruh ïa u Bah Jubanlang Kharbihkhiew ba un dang ïai trei shitom ha ka ban kyntiew ïa ki jingai jinghikai na ka bynta ki khun samla ba kin lah ban ïoh ïa ka kam ka jam hadien ba ki la pyndep ïa ka jingshah hikai.
