Shillong, Naitung 25:
U Director General of Police (DGP) ka jylla, Dr. L.R Bishnoi u la ïathuh ba ki pulit ki la lap ba ka daw jong ka jingmih ka huri-hura ha Tura ka dei ka kam kaba la ïasuhbuit lypa bad ba la pynkhreh bha, da ka jingthmu ban pynmynsaw bad shim ïa ka jingim jong u Myntri Rangbah ka jylla u Conrad K Sangma.
Ha ka jingïakynduh bad ki lad pathai khubor ha ka sngi Ba-ar, u DGP u la ong, “Ka jingmih jong ka jingkulmar ha ka janmiet jong ka sngi Nyngkong shabar ka jaka long jingïalang ka dei kaba la ïasuhbuit lypa bad kaba la pynkhreh bha ban ïoh pynmynsaw ïa u Myntri Rangbah.”
U Dr. Bishnoi u la ïathuh ba ka jinglap jong ki pulit ka long hadien ba ki la ïoh ban lum ïa kiba bun ki jingtip na ka jaka kaba la mih ka huri-hura kaba kdew shai ba katei ka huri-hura ka dei kaba la dep ïasylla lypa bad ym tang katne, hynrei la ïoh jingtip ruh ba ka la don ka jingsam pisa shi sngi shwa ban long katei ka jingïalang.
U la ïathuh ruh ba nalor kane, ki pulit ki la ïoh ban kurup ïa ki maw bun bah na ka jaka kaba la mih ka huri- hura, 50 tylli ki siej ba la pynkhreh ban bom ïa ki pulit, 20 tylli ki knah, shi jarkan ka umphniang sharak, ki bilor kyiad bad ki jingpruid.
“Ki la kynshoit ïa ki paidbah ban pynmynsaw ïa u Myntri Rangbah bad ki la pynbor ban shim syndon ïa ka sienjam kaba heh ban shim ïa ka jingim. Kine ki jingleh jong ki samla ka kdew shai ba ka dei kaba la dep ban ïasylla bad kaba la dep ban thmu lypa,” la ong u Dr Bishnoi.
U DGP u la ai ka jingkular ba na ka liang jong ka tnat pulit kan nym map satia ïa kito kiba donkti, hynrei ban kem bad set hapoh patok bad ban pynshitom katkum ki kyndon jong ka aiñ.
Nalor kata, u la ïathuh ba haduh kane ka khyllipmat, ki la don haduh 19 ngut kiba la shah kem kiba kynthup ïa u nongïalam ka TMC u Richard Mrong Marak uba la ïakhun ïa ka ilekshon MLA 2023 na South Tura bad u Salseng Ch Momin uba la ïakhun ïa ka ilekshon MDC ba la dep na Siju constituency. Kine ki la shah kem halor ka jingkynnoh ba ki la donkti ban thaw huri-hura.
“Nalor kane, na ka liang jong ngi, ngi la ithuh ruh ïa ki 26 ngut kiwei pat lyngba ka jinglap ksai na ki dur khih (video) halor ka jingkawang maw bad ka jingthang ïa ki kali,” la ong u DGP.
Haba kylli, na ka liang jong u DGP u la ong ba haduh mynta yn nym pat lah ban ong ba ki dei ki briew ba don bynta bad ki seng saiñ pyrthei ne na kiwei pat ki kynhun. Tat ynda la dep ban ïoh tohkit bniah yn sa lah ban ai jingtip kiba bniah halor kiba shah kem.
Kumba ka long mynta, ka jinglong jingman ha nongbah Tura ka la sdang ban jai jai, khlem da don shuh kino kino ki jingkulmar.
“Ngin ym map ïano-ïano ruh kiba donkti ha katei ka kam thombor bad pyrshang ban thombor ïa u Myntri Rangbah ka jylla bad ban pynjulor ïa ki kali jong ki heh sorkar bad shen ngin set ïa kiba donkti hapoh patok,” la ong u DGP.
Nangta, u la pyntip ba ki pulit ki dang thwet jur ïa ki nongïasylla bad ki la sdang ban pynlong ïa ka jingkhynra naduh ka miet jong ka Sngi Nyngkong.
Shuh shuh u DGP u la pyntip ba ïa katei ka jingjia la dep ruh ban pynrung kyrteng hapoh ki kyndon bapher bapher jong ka IPC kynthup hapoh ka Meghalaya Maintenance Public Order Act, 2010, bad ka Prevention of Damage to Public Property Act.
U DGP u la ïathuh ba ha ka jingjia ha Tura, ki la don 18 ngut ki pulit bad CRPF bad kawei ka Homeguard kiba la mynsaw na ka jingshah ther maw ha ki paidbhur ha kaba 16 ngut ki dei ki shynrang bad 2 ngut ki dei ki kynthei.
U la pyntip ba ki la don 4 tylli ki kali kiba la shah wiang ding bad 17 tylli ki la julor na ka jingshah ther maw. Na kine 17 tylli ki kali, 5 tylli ki dei na ka kynhun jong u Myntri Rangbah, kawei ka kali jong u MLA ka Williamnagar u Marcuise N Marak, kawei ka kali kaba dei ka jong u Deputy Secretary jong u Myntri Rangbah, 2 tylli jong ki bor pynïaid district, 4 tylli jong ki pulit, kawei ka kali kit nongpang bad 3 tylli ki kali jong ki ’riew shimet.
U DGP u la ong, wat la ka la don ka jingther maw bad ka jingshah thang ki kali, hynrei ki pulit kim shym la siat ïano-ïano ruh namar ba kim kwah ban pynmynsaw ïa kiwei pat ki samla kiba jai jai, kiba don lang ha katei ka jaka bad ïashim bynta ha ka jingïakhih.
Nalor kane, u DGP u la pyntip ruh ba la pynjur shuh shuh ïa ka jingpahara ki pulit bad la phah ruh ïa u IGP (Law & Order) ban khmih bniah bad peitngor ïa ka jinglong jingman baroh.
U la ïathuh ba ki pulit ki la dep ban pynrung kyrteng ruh ïa ka ejahar kaba la ujor da u Majistor halor katei ka jingjia.
