Shillong, Naitung 25:
Ka Executive Committee jong ka Khasi Hills Autonomous District Council (KHADC) ka la rai ban pyllait noh ïa ka pisa kaba sahteng lane arrear kaba dei ban siew sha ki nongtrei ka Council kiba dang trei bad kiba la shongthait nalor ka Dearness Allowance bad ka pisa kaba dei ban siew sha ki MDC barim.
Haba kren sha ki lad pathai khubor hadien ka jingïalang ka ba-ar jong ka Executive Committee mynta ka sngi ka 25 tarik Naitung 2023, u Chief Executive Member (CEM) u Bah Pynïaid Sing Syiem u la ïathuh ba ka Arrears kaba dei jong DA ruh kaba kot sha 80 lak tyngka bad ka pisa jong ki MDC barim ba ka Council ka dei ban siew kum ka baibam kaba kot 24 lak tyngka, la mynjur ban pyllait noh.
Lada kheiñlang ïa ka pisa kaba dei ban pyllait noh ka long T.6.5 klur, bad na kane, T.5 klur ka dei tang ka arrear jong ki nongtrei ka Council.
Ka Executive Committee ka la mynjur ruh ïa ka jingtyrwa ka tnat lariti jong ka Council ban pynlong biang ïa ka monolith festival ha Khasi Heritage Village, Mawphlang ha u Nohprah mynta u snem da kaba ïatreilang bad ka tnat jngohkai ka Sorkar Jylla na ka bynta ban pyni sha ka pyrthei ïa ki riti dustur ka jaitbynriew naduh ki ïing trep, ki riam, jingtem bad jingrwai, jingbam bad kiwei kiwei.
Shuh shuh ka Executive Committee ka la mynjur ruh ïa ka Land Rules ban pyntreikam ïa ka Land Act jong ka Council khnang ba kito kiba don jaka puta kin pynrung kyrteng bad ka KHADC ha ka dor kaba kham duna bad yn ai ruh ïa ka syrnot jaka kaba tip kum ka ‘Land Title Rights Certificate’ kum ka jingpynshisha da kaba ïoh ruh ka jingpynshisha na ki Dorbar Shnong, Raid bad Hima.
U CEM u la ïathuh ruh ba ka Executive Committee ka la ai jingmynjur ruh ban pyndonkam ïa ki kyndon jong ka Fisheries Act, 1954 kaba la don lypa ha kaba ka jingpynbna ka la don lypa haba ïadei bad ka jingpynlong ïa ki jingïakob khwai dohkha bad ki nongpynlong ïa ka jingïakob ki dei ban shim jingbit na ka KHADC.
Ka Executive Committee ka la mynjur ruh ban thaw thymmai ïa ka Khasi Traditional Medicine Commission ha kaba u CEM un long kum u Chairman.
U CEM u la ong ba ka Khasi Traditional Medicine Institute kaba la tei ha Lum Sohpetbneng yn sa plie noh shen bad mynta ki dang sah sa ki kam barit baria kiba dei ban pyndep noh kloi.
U la ong ba ïa kane ka jaka sumar kynbat Khasi yn pynïaid da ka kynhun kaba shu shahjied lyngba ka EOI, katba ki nongsumar kynbat Khasi kin don ha kane ka jaka sumar ban ai ka jingsumar ia kiba wan phah sumar ha ki.
Shuh shuh la mynjur ruh ban ïatreilang ka Council bad ka Sorkar Jylla ban pyntreikam ïa ka Scholarship na ka bynta kiba leh ka jingwad bniah (research) halor ka jinglong kyrpang ka riti dustur.
