Shillong, Naitung 25:
Ki dkhot ka Ïingdorbar Thawaiñ kiba don sha ka liang synshar Meghalaya Democratic Alliance (MDA-2) kiba kynthup ruh ïa ki Myntri bad MLA ki la pynrem jur ïa ka jingthaw jingkulmar ha Tura ha ka por ba dang ïaid ka jingïakren hapdeng u Myntri Rangbah, u Conrad K Sangma lem bad u Myntri Sorkar u Marcuise N Marak bad ki kynhun kiba shong shah jingit ban dawa pynlong noh ïa ka Tura kum ka nongbah por tlang bad rukom pyntreikam ïa ka Roster System.
Ha u kyrwoh ba la soi da kine ki MLA, la pynrem jur ïa kane ka jingjia kaba pynlong ïa ki pulit pahara ban mynsaw namar ki la shah lun maw bad ka don ruh ka jingkawang maw ïa ka shlem treikam u Myntri Rangbah ha ka por ba dang ïaid ka jingïakren.
Haba pynpaw ka jingdiaw ïa ka jingleh ’riewkhlaw kiba thaw jingkulmar, ki MLA ki la ong ba kine ki jingleh ki long ki bym lah pdiang khamtam haba u Myntri Rangbah u dang ïakren ban poi sha ka jinglah ban pynbeit ïa ki jingeh.
Kumta ki MLA ki la kyrpad ïa ki paidbah ban pynneh ïa ka suk ka saiñ bad kiar na kaba ïasnoh kti bad kum kine ki kam runar bad ki kam be-aiñ.
Shuh shuh kine ki MLA ki la dawa ban leh da kaba tyngeh ïa ki briew kiba donkti ban leh ïa kine ki kam pyntriem bad ban pyntikna ba kum kine kin nym jia shuh hadien habud.
Ki MLA kiba la soi lang ha u kyrwoh pynrem ïa kiba thaw jingkulmar ki kynthup ïa u Marthon Sangma, Jim Sangma, Rupert Momin, Pongseng R. Marak, Sengchim N. Sangma, Arbinstone B. Marak, Kartush R. Marak, Jimmy D. Sangma, Limison D. Sangma, Subir Marak, Sanjay A. Sangma, Ian Botham K. Sangma, A. L. Hek, R. G. Momin, Paul Lyngdoh, Mayralborn Syiem, S. Sohtun, Damanbait Lamare, Wailadmiki Shylla, Santa Mary Shylla, Methodius Dkhar bad Rakkam A. Sangma.
