Shillong, Naitung 25:
Kawei ka kynhun ba la tip kum ka ‘Legal Rights Observatory (LRO)’ ha ka janmiet jong ka Lah Sngi U Blei ka la pynsaphriang ïa ka jingtip lyngba ka rynsan ‘Twitter’ ba ki dkhot ka Khasi Students’ Union (KSU) ki la donkti ha ka jingjia ha Mahadev Khola.
Lyngba ka ‘Twitter Handle’ ba la ai kyrteng ‘@LegalLro’, katei ka kynhun ka la thoh kumne: “Khasi Students Union- KSU goons attacked Mahadev Khola mandir, 101 Area Lower Iowsohtun, Shillong, Meghalaya. We can be see them assaulting priests women devotees including family of priests. Hope @SangmaConrad @MeghalayaPolice act…?” (Sic).
Haba pynwan sha ka Khasi, katei ka jingthoh ka mut: “Ki dkhot ka Khasi Students’ Union – KSU ki la thombor ïa ka Mahadev Khola Mandir, 101 Area Lower Lawsohtun, Shillong, Meghalaya. Ngi lah ban ïohi ïa ki ba ki la thombor ïa ki rangbah niam, ki kynthei/longkmie bad ki bahaïing hasem jong ki rangbah niam. Kyrmen ba u @SangmaConrad @MeghalayaPolice kin leh ïa kaba donkam.”
Lah ban kdew ba hynnin hi ka sngi, u Superintendent of Police (SP) ka East Khasi Hills, u Bah Sylvester Nongtnger, u la phah da ka jingthoh sha ki lad pathai khubor ban pyntip ba ha ka por 12 baje mynsngi, ka la don ka jingshah thombor jong kawei ka dukan ha Mahadev Khola.
Ka kyrwoh khubor ka la ong ba uwei u briew uba la wan sha Mahadev Khola, uba la pan ïa ka jingdih ‘Amul Kool’ na kawei na ki dukan kaba don ha kane ka jaka bad ong ba un sa siew pisa kham hadien hynrei hadien ba ka trai dukan ka la kyntait, une u briew u la kawang da u snepkor sha ka.
La ong ba ha ka por ba u khun jong ka, uba la 21 snem, u la wan ban tuklar ïa kane ka kam, la mih ka jingïajrong kti. Hadien kumba shiteng kynta eiei, une u briew u la wan biang ryngkat bad saw ngut kiwei pat ban thombor ïa kane ka briew lem bad ïa u khun jong ka, tuh ïa ka pisa na ka dukan bad ban phet krad na kane ka jaka.
Hadien ka jingïoh jingtip, ki pulit na Jhalupara OP ki la wan mar-mar sha kane ka jaka ban pynlong ka jingtohkit. Kane ka briew lem bad u khun jong ka, ki la mynsaw malu-mala bad hadien ba la dep ban eksamin bad pyntah dawai, la pyllait noh ïa ki.
Ha kaba ïadei bad kane, la pynrung ïa ka jingujor hapoh ka thanat Lumdiengjri bad na ka liang ki pulit ki dang leh katba lah ban thwet bad kem ïa kine ki briew.
Mynta ka sngi, u SP u la pyntip ba la ïoh ban kem noh ïa ki 3 ngut ki briew ba la kynnoh donkti ha ka jingjia ha Mahadev Khola, ha kaba kawei ka longkmie ka la shah thombor ha ka kynhun.
“Hadien ba ngi la dep ban peit ithuh bha na ki video ba la ring da ki kor CCTV ba la pyndait ha phyllaw jong ka jaka mane, ha kaba ngi la lah ban ithuh ïa ki runar kiba la donkti ha katei ka jingjia bad kumta ha ka por mynmiet ngi la pynlong ka jingkhynra bad ban ïoh kem ïa ki lai ngut ryngkat bad ar ngut ki khynnah rit,” la ong u SP haba kren sha ki lad pathai khubor.
U SP u la pyntip ruh ba la dep ban pynrung da ka jingujor ha kaba ïadei bad katei ka jingjia ha Mahadev Khola ha thanat Lumdiengjri, bad ba ïa ki lai ngut ki runar yn sa leit ïalam hakhmat ka ïingkashari.
Shuh shuh na ka liang jong u Bah Nongtnger u la pyntip ruh ba ïa ka jingtohkit yn pynïaid ha ka rukom kaba dei bad yn sa shim ki lad pynshitom katkum ki kyndon jong ka aiñ.
Na u kyrwoh bad na ka jingkren u SP, ym shym la kdew satia ba ki dkhot ka KSU ki la donkti ha katei ka jingjia, hynrei haduh ba thoh ïa kane ka khubor, ka LRO kam pat shym la weng satia ïa katei ka jingthoh bad jingkynnoh jong ka pyrshah ïa ka KSU.
