Nongstoiñ, Naitung 25:
Ki kam tuh kam thiem ha ki bynta jong ka sor Nongstoiñ bad ha Ïew Nongstoiñ ki la sdang ban jyllei bha ha kine ki sngi. Kane ka la buh ruh ha ka jingsyier bad rit mynsiem khamtam ïa ki nongshong dukan bad ki trai dukan.
Katei ka kam tuh kam thiem ka la jia ruh ïa kawei na ki dukan kaba la shah prong tuh kaba dei ruh ka dukan kaba la long trai da u Bah Basil Kharbani kaba don ha khlieh ïew Nongstoiñ.
Shuh shuh la ïathuh ba katei ka jingjia la suba jur ba ka lah ban dei ha ka por shiteng miet jong ka Sngi U Blei ha kaba la ong ba ki runar kim salia shuh ban pynpra wat ïa ka kynroh ba la tei da ka dewbilat jong ka dukan na ka bynta ban ïoh rong tuh ïa ki tiar ki tar kiba don shapoh ka dukan.
U Bah Basil u la ïathuh ruh ba katkum ki dak ki shin, ki runar ki la pyndonkam da ki kynja tyrnem, ki shñiah bad kiwei de ki tiar na ka bynta ban pynpra ïa ka kynroh maw jong ka dukan. Hadien kata, ki runar ki la rong tuh ïa bun ki tiar kum ki ryngwiang khwai (Fiber) ba rem dor, ki ril, ki khwai, ki ksai khwai bad kiwei kiwei ki mar kiba la antad kiba kot sha ka 2 lak tyngka.
Shuh shuh u la ïathuh ruh ba halor katei ka jingjia, na ka liang jong u trai ka dukan, u la leit ruh ban buh da ka jingujor sha ki pulit ka thanat Nongstoiñ.
