Tura, Naitung 25:
Uwei u briew ba la tip kyrteng kum u Jackson A Sangma, uba la don lang ha ka jingïalang ba la pynlong da u Myntri Rangbah, Conrad K Sangma, bad ki kynhun seng ha Tura ha ka Lah Sngi U Blei, u la shah kem halor ka jingkynnoh ba u la donkti ban pynshit ïa u paidbhur uba la leit kawang maw ïa ka shlem treikam u Myntri Rangbah katba ka jingïalang ka dang ïaid.
Ha kaba ïadei bad kane, ki don ki khubor kiba la kam ba u Jackson u dang dei u nongkyrshan ka seng National People’s Party (NPP), bad ki don ruh ki khubor kiba la kam ba um dei shuh u nongkyrshan jong kane ka seng kaba ïalam ïa ka jingsynshar ha ka jylla.
U Jackson u dei uba shong ba sah ha ka dong Nikwatgre kaba dang hap ha Dakogre, Tura bad dei ha kane ka jaka ba ka la don ka jingkawang maw hynnin ka janmiet.
U Myntri Rangbah u la shong jingïalang bad ki kynhun seng kiba la pyrshah ïa ka Roster System bathymmai bad ban dawa pynlong ïa ka Tura kum ka nongbah ka Meghalaya. Hynrei ha ka por kumba 7:30 janmiet, katba ka jingïalang ka la jan poi artad sha kaba kut, ki la mih kynsan ki paidbah kiba la pyrta shla bad kawang maw. Ha kane jingkawang maw ki la don bun ngut ki pulit pahara kiba la mynsaw.
Hynrei kaba lyngngoh ka long ba kumno u Jackson u la poi sha katei ka jingïalang. Ki khubor kiba la ïohlum ki ïathuh ba u Jackson u la mih noh na katei ka jingïalang hadien katto katne por, bad u la leit ban don lang bad ki paidbah.
Ha ka jingjia kaba hynnin ka sngi, kumba 18 ngut ki pulit ka jylla, ki CRPF bad ki Home Guard ki la mynsaw ha ka jingkawang maw katba ki pulit haduh mynta ki la kem ïa kumba 22 ngut ki briew halor ka jingkynnoh ba ki la donkti ha kaei kaba la jia.
Ki la don ruh bun tylli ki kali kiba la julor na ka jingshah kawang maw ha ki paidbah.
