Shillong, Naitung 25:
U nongïalam jong ka Trinamool Congress (TMC) u Richard Marak u la shah kem noh ha ka Sngi Ba-ar halor ka jingkynnoh ba u la donkti ban pynshit bad kynshoit ïa ki paidbah ban thaw jingkulmar shwa ba ka jingïalang hapdeng u Myntri Rangbah ka jylla bad ki nongïalam seng kan wai, kaba la wanrah ïa ka jingïakhih kaba jur jong u paidbhur kaba la jia ha ka janmiet jong ka sngi Nyngkong ha Tura.
Lah ban kdew ba ha ka janmiet jong ka sngi Nyngkong ka la mih ka jingkulmar kaba jur ha nongbah Tura, kata shabar jong ka jaka pynlong jingïalang ba la don lang u Myntri Rangbah ka jylla. Ha kane ka jingjia ki paidbhur ki la lun da ki maw sha ki pulit pahara haduh ba ka la lam sha ka jingmynsaw jong kiba bun ngut ki pulit bad ka jingjulor jong ki jingdon jingem bad jingshah wiang ding jong ki kali.
Kumta haba ïadei bad kane ka jingjia na ka liang ki bor pynïaid district kim banse ban pynjari noh da ka kyndon 144 CrPC bad kumjuh ka korphiw miet. Na ka liang jong ki pulit ka Tura ki la pyntip ba ka la don lypa ka jingïasylla da u Richard ban thaw jingkulmar.
Lah ban kdew hangne ruh ba u Richard Marak u dei uba ïajan bha bad u Myntri Rangbah barim u Mukul Sangma, uba dei ruh u nongïalam ka TMC. U Richard u la ïakhun ruh ïa ka ilekshon MLA pyrshah ïa u Conrad K Sangma na South Tura hynrei u la shah rem noh ha u 2023.
