Shillong, Naitung 25:
U President ka Khasi Students’ Union (KSU) Sengkmie, Bah Lambokstarwell Marngar u la pynpaw ba ka sorkar kam dei ban leh politik ïa ka lynti rel katba kam pat lah ban pyntreikam ïa ka Inner Line Permit (ILP) hapoh ka jylla.
U Bah Marngar u la ong ba kane ka jingthmu ka sorkar ban wanrah ïa ka lynti rel sha East Jaiñtia Hills District ka long ban leh politik ban pynkulmar jingmut ïa ki paidbah hadien ba kam ïoh lad ïoh lynti ban pynïaid ïa ka lynti rel sha Byrnihat.
U la ong ba haduh mynta ka sorkar kam shym la ai jubab ïa kaei kaba ki nongïalam ka KSU East Jaiñtia Hills ki la phah da ka jingthoh ban pyrshah ïa kane ka jingthmu jong ka sorkar jylla ban wanrah lynti rel sha katei ka thaiñ.
“Lada ka sorkar jylla kam pat pyntreikam ïa ka ILP, lada ka wanrah noh da kano-kano ka jaka hapoh ka rilum Khasi Jaiñtia ka seng KSU kan nym shah ban wanrah ïa ka lynti rel” u la ong.
Nalor kata, u la ong ba ka seng kam tip la ka sorkar kan jubab ne kan sngap jar jar halor ka jingpyrshah ka KSU East Jaiñtia Hills halor ka jingthmu ban wanrah lynti rel hadien ba ka la dep buh da ka jingthoh sha u Deputy Commissioner. Hynrei ka seng kan pyrshah beit lada pyntreikam bad kam sngap ïa ka jingdawa jong ka seng.
Shuh shuh u la ong ba ïa kane ka jingdawa ïa ka ILP ka dei kaba la slem bha namar wat ha ïingdorbar thawaiñ jong ka jylla la dep mynjur. Kumta ka seng ka pynkynmaw biang ba lada ym pat don ki aiñ kiba khlaiñ ban ïada ïa ka jingrung kyrthep ki bar jylla shapoh ka jylla kan nym shah ban pynïaid ïa ka lynti rel.
