Tura, Naitung:
U MDC ka BJP na Tura u Bernard N Marak u la pyntip ba ka jingrwai kaba u ai kyrteng “Shisien (Once)” yn sa pyllait shen na ka bynta ki briew kiba shem lanot namar ka jingumsnam ha Manipur bad ha kajuh ka por u kwah ban pynlong ïa ka jingrwai jingtem ha Tura kum ka jingpynmih pisa bad ban duwai na ka bynta ka jingsuk bad na ka bynta kiba shem lanot.
U Bernard u la ong ba ka jingjia ha Manipur ka dei ka jingïakynad hapdeng ki ar jaitbynriew, hynrei ki briew pat ki shim kabu saiñ hima bad pyrshang ban kynnoh ïa ka BJP.
“Ngi la sakhi ruh kajuh ka jinglong jingman ha ka Jylla jong ngi katto katne snem mynshwa bad haba ka jingdum ka wan, dei tang ka jingduwai kaba treikam. U Blei u lah ban wanrah jingsuk ha Manipur bad ïa kane ka jingrwai la thaw da kaba buh jingmut ba haba la duh jingkyrmen, ka jingngeit jong ngi ka ai jingkyrmen,” la ong une u MDC ka Tura.
