Shillong, Naitung 26:
Ka Hynñiewtrep Border Dispute Redressal Forum (HBDRF) ha ka Sngi Balang ka la wan ban pynshai sha ki lad pathai khubor halor ki artylli ki bynta kiba la mih ha ki lad pathai khubor kiba kynthup halor ka jingong jong ka Forum ba lada ki paidbah Karbi kim sngewtynnad ban shong ban sah hapoh ka jylla Meghalaya ki lah bha ba kin mih noh bad ba ki lah ban leit phai noh sha ki jaka kiba ki wan bad kaba ar pat ka dei ba lada ka khyrdop lum khajna jong ka Karbi Anglong Autonomous Council ka dang ïaineh sah hapoh ka shnong Khanduli kan sa jia biang kumba jia ha Mukroh.
Haba pynshai sha ki lad pathai khubor ha Shillong Press Club halor kitei artylli ki bynta, u Bah Chandame Sungoh uba dei u Chairman jong ka HBDRF, u la ong ba halor ka jingong jong u ba lada ki karbi kim suk ban shong ban sah bad ki paid Khasi Jaiñtia hapoh ka jylla ki lah ban leit noh. Kane ka dei namar ba ki paidbah jong ngi ki ju shah pyndik bad shah pynjynjar ha kiba bun ki liang ha ki jaitbynriew Karbi nalor ba kitei ki jaitbynriew ki lah shong la sah ha ka jaka ka puta jong ki paid Khasi Jaiñtia.
“Ki briew jong ngi ki shah pyndik bad shah lehbeiñ ha kiba bun ki liang ha kine ki Jaitbynriew nalor ba ki shong ki sah hapoh ka khyndew ka shyiap ka jong ngi”, la ong u Bah Sungoh.
Ha kaba ïadei pat bad ka jingong jong u ba lada kane ka khyrdop khrong khajna kaba don ha Khanduli kan dang ïaineh sah ha Khanduli kan jia kumba jia ha Mukroh, u Bah Sungoh u la ong ba ka jingkren jong u kumtei ka dei namar na ka por sha ka por ki lah dep ban leit ïakynduh bad leit ai da ka dorkhas sha ki bor kiba halor kiba dei khmih halor kane, hynrei haduh mynta ym shym la don satia kino kino kiba shimkhia eiei. Kane ka wan ruh wat haba ki paid Khasi-Jaiñtia ki ïakynduh jingeh shikatdei eh ha ka leit ka wan lyngba ka jingdon jong katei ka khyrdop kaba lah khang lynti ïa ki.
U Bah Sungoh u la kren da kaba tyngeh ruh ba lada ki artylli ki sorkar jong ka jylla Meghalaya bad ka jylla Assam kim shimkhia ban wanrah ïa ka shongsuk shongsaiñ mardor ban weng ïa katei ka khyrdop, ka kynhun kam banse ban shim da ka rai kata ban thoh noh sha ka Human Rights Commission.
“Na ka liang jong ngi, ngin ai por 10 sngi ïa ka sorkar ba kan leh eiei halor kane bad lada kam leh eiei hapoh ka 10 sngi, ngim banse ban ai noh da ka jingthoh sha ka Human Rights Commission”, la ong u Bah Sungoh.
U la ong ba ka shnong Khanduli ka dang dei ka shnong kaba dang hap hapoh u pud u sam jong ka jylla Meghalaya bad kam ïahap ba ka sorkar Assam kan kam trai ïa katei ka jaka bad u la ong ba ka sorkar Meghalaya ka dei ban shimkhia ban dawa ba ka sorkar Assam ka dei ban pynphai noh ïa ka Block-1 sha ka jylla Meghalaya.
“Ngi haduh mynta kum ka Forum bad ki paid nongshong shnong jong ka Block-1 baroh kawei, ngi dawa ba dei ban pynphai noh ïa ka Block-1 jong ngi”, la ong u Bah Sungoh.
U Bah Thomas Passah uba dei u nongaiktien jong ka HBDRF, u la ong ba ka katei ka khyrdop kaba don hapoh Khanduli ka dei kaba la wanrah da ka Karbi Anglong Autonomous Council ha ki khyllipmat kiba ki artylli ki jylla ki dang mut ban pynbeit ïa u pud u sam bad kam dei ka khyrop kaba la don naduh mynshwa.
“Ka jingthmu ka long ba ki Karbi ki la buh khnang ïa kato ka khyrdop ba kin ïoh ban kam trai ïa ka Khanduli bad kata kam don jingartatien shuh hangno hango ruh”, la ong u Bah Passah.
