Shillong, Naitung 26:
U nongïalam ka Congress u Saleng Sangma, MLA ka Gambegre u la pynrem jur halor ka jingpynmih jingkulmar ha Tura, ha ka por ba u Myntri Rangbah u Conrad K Sangma u dang shong jingïalang bad ki nongïalam seng bad kiwei kiwei.
U Saleng u la ong ba ka jingmih jingkulmar ha kane ka sngi, kam dei kaba la shu leh shongshit hynrei ka dei kaba la ïasuhbuit bad ïasylla lypa.
Haba kren sha ki lad pathai khubor halor ka jinglong jingman ka shongsuk shongsaiñ hapoh ka jylla, u Saleng u la ong ba kane ka jingkulmar kaba la mih, ka la wanrah ka jingduhnong kaba khraw, ha kaba ka la ktah ïa ka imlang sahlang bad ki paidbah.
U la ong ba ka thong jong ka jingdawa nongbah ha ka por tlang kaba la sdang ban ïoh jingkyrshan bad ïaid bha shakhmat lyngba ki jingïakhih, hynrei ka jingshah thombor jong u Myntri Rangbah ka la pynlong ïa kane ka jingdawa ban shah ktah, kaba dei ban pynrem jur.
“Ki jingdawa kiba la wanrah shakhmat ki la long shisha kiba biang bad don nongrim bad kiba la ïoh jingkyrshan, hynrei da kaba pynmih kum kine ki jingklumar ban pynthut ïa ka jingïalang ka long kaba bakla shibun,” u la ong.
Haba pyntip ruh ba ka la don jingpulom na ka liang ka tnat syntiat, u Saleng u la pyntip ba tang khyndiat sngi shwa kane ka jingïalang jong u Myntri Rangbah, ka Myntri sorkar ka Kong Ampareen Lyngdoh ka la shah beh na Jinjal, kaba la dei ban pynlong ïa ka sorkar ban peitngor bad pynkhlaiñ ka jingpahara.
Ha kawei pat ka liang, halor ka jingshah kem jong ki briew na ka jingjia ha Tura, u Saleng u la ong ba ka sorkar kam lah ban shu leit kem naphang ïa ki briew tang da kaba shu tharai, hynrei ban don ka jingtohkit kaba janai.
“Ki pulit ki dei ban rah ne kem ïa ki briew halor ki sakhi kiba biang, bad dei ban don ka jingtohkit kaba laitluid ban kem ïa ki briew kiba donkti halor kane ka kam,” la ong u Saleng.
