Mawkyrwat, Naitung 26:
U Bah Renikton Lyngdoh Tongkhar MLA ka Mawkyrwat Constituency ha ryngkat ka jingdonlang ki ophisar sorkar naduh u BDO ka Mawkyrwat Block, u Bah I. Lawriniang, Bah S.I. Laso, SDO PWD Roads Mawkyrwat bad kiwei kiwei ha ka Sngi Balang u la jurip ïa kawei ka jaka jngohkai kaba itnynad bha kaba don ha ka shnong Mawten, South West Khasi Hills kaba la tip kum ka Synrang Mawrin.
Kane ka Synrang Mawrin ka dei ka jaka kaba dap tang da ki synrang maw kiba itynnad, kiba heh bad kiba wandur bha.
Kum ban shu kdew ïa kane ka jaka la pyntrei bad pynitynnad shuh shuh ïa ka da ka shnong Mawten ryngkat ka jingïatreilang bad ka shlem u Block Development Officer, Mawkyrwat lyngba ka skhim 100 sngi ha ka jinglut kaba T. 2 klur eiei.
Na ka liang u Bah Renikton ha kane ka sngi u la ïathuh ruh ba ïa kane ka jaka jngohkai pyrthei yn sa plie paidbah noh ha ka 4 tarik Nailur, 2023 da u Myntri ka tnad jngohkai pyrthei ka sorkar jylla bad u khmih lynti ruh ba lyngba ka jingïatreilang jong ki tnat sorkar bapher bapher kane ka jaka kan sa kylla dur bad yn sa lah ba pyndep ïa ki kam kiba sahteng baroh ha shwa ban plie ïa ka.
