Shillong, Naitung 26:
Ka Khasi Students’ Union (KSU) ha ka Sngi Balang ka la ujor ejahar pyrshah ïa ka Legal Rights Observatory (LRO) bad maham tyngeh ïa kane ka kynhun ban kiar na kaba pynsaphriang ïa ki jingthoh kiba ïalam bakla.
“Ngi la ïohi ïa kawei ka jingkynthoh na kawei ka kynhun – LRO (ngim tip ki dei mano) halor ka jingjia ba malu-mala ha sor Shillong ha kaba ki la kynnoh ïa ka jingdonkti jong ka KSU. Kaba kham sngewsih ka long ba ki kynnoh ba ka Balang Presbyterian ka dei ka nongkynshoit ba kin sa jia kine ki jingjia,” la ong u President ka KSU, samla Lambokstarwell Marngar haba kren sha ki lad pathai khubor.
Haba kdew ba katei kam dei shuh ka sien banyngkong ba ka LRO ka la pynmih ïa ki jingthoh ha ki rynsan lad pathai, u la ong ba katei ka kynhun na ka por sha ka por ym tang ba ka wanrah ïa ka jingsngewpher jaidbynriew hynrei ka wanrah ruh ïa ka jingsngewpher niam.
“Ngi im ha ka ri India kaba ngi ngeit ba ka dei ka ri synshar paidbah, ka Riti Synshar ka Ri ka kren shai ban burom ïa ki jaidbynriew kiba im hapoh ka ri, jait ktien, jait jingngeit bad kumta ter-ter. Hynrei ngi ïohi ba kine ki briew na ka por sha ka por ki pyrshang ban ïalam bad pynsngewthuh bakla ïa uba bun balang,” u la ong.
Ka LRO ha ka janmiet Lah Sngi U Blei ka la pynsaphriang ïa ka jingtip lyngba ka rynsan lad pathai ‘Twitter’ ba ki dkhot ka KSU ki la donkti ha ka jingjia kaba la jia ha Mahadev Khola.
Ka seng halor katei ka bynta, ka la dep ban ujor da ka ejahar ha u S.P. (City) ban leh ïa kaba donkam.
“Lada ka tnad pulit kam shimkhia ban buddien ïa kum kine ki briew, ngi ïohi ba kan wanrah ka jingmynsaw bad kan poi sha kawei pat ka lynti. Haba ngi ai lad ïa kine ki nongkynshoit, ngi long kumba ai lad ïa ki briew kiba wanrah ka pyrkhat pyrdaiñ kaba ngi hap ban ïa umsnam,”
U samla Marngar u la ong ba ka seng ka kren da kaba shai ba kam kwah ba kine ki nong lamler kin ïalam bakla ïa kano-kano ka mat da kaba pynheh ïew ïa i kam iba rit eh.
“Ïa mynta ka kynti, ngi shaniah ha ka bor jong ka aiñ ban leh ïa kaba donkam, hynrei lada ka bor jong ka aiñ kam lap, ngi ruh ngin hap pyrkhat da kiwei pat ki sienjam khnang ba kine ki jingïalam bakla kin ym jia shuh nangne shakhmat,” la ong u nongïalam ka seng.
Haba pynsngew ba kitei ki jait jingthoh kiba pharep kulmar ki ïalam bakla wat ïa kito kiba na ri-thor ka India, u samla Marngar u la ong, “Kito kiba pyntreikam ïa ka sla jong ka LRO, da kham tyngkan u thylliej bad kham antad ka thaw ktien bad ban ïalam bakla.”
Shuh shuh u la bynrap ba ka seng kam lah ban shu peit bad lada kitei kijuh ki briew ki ïai bteng ïa katei kam, ka KSU kan buddien ban lap mano ba donkti ha ka ban pyntreikam ïa ka sla ka LRO ha ki rynsan lad pathai.
“Lehse ki dei ki briew kiba nangne hi kiba im sngi ban wanrah ka huri-hura, jingkulmar bad lehse ki dei ma ki hi ruh ba sdang kine-kitai khnang ban ïoh kynthoh pat ïa ka KSU ba ka donkti,” u la ong.
Nalor kane, u President u la ong ba ka seng baroh shi katta ka ïaid ha ka lynti jong ka jingïaishah hynrei lada shim kabu ïa kane ka jingïaishah, yn hap pyrkhat da ki lad ki lynti kumno ban pynkylla ïa kata ka jingïaishah sha ka lad ka lynti ka ban hap jubab.
